Veur Notaris Strens ontworp Frans Dupont deze kapitale villa op de hook van Nuje Boelvaar en de Sjlachhoessjtraot. Dit mit volle oetkiek op ’t laeg Wilhelminaplein. (Mot det plein neet omgeduip waere in ’t Frans Dupontplein? Hae had op die plaats ouch zien sjtadstejater gedach). Deze get “ajerwetsere” sjtiel beheersde hae dus ouch, naeve zien Jugenstil ontwerpe. Ein aantal jaore deende ’t pandj es hoofketoor veur de “Limburgsche Tramweg Maatschappij”, de L.T.M. Toen ouch plaogend “Laeg toet Meyel” geneump.
Wie de tramliene waerde vervange door bösse kwaam d ‘r achter dit hoofketoor ein graasj. Hie zoot later de Keuninklikke Piepefebriek van Gubbels in. Det is noe onherkinbaar verboewd door de Albert Heyn. De kern van ’t geboe is d’r, intern, nog sjteeds.
Veer kinne gelökkig nog altied ’t ontwerp van Frans herkinne. De ongerste boelaog is helaas versjangeleerd wie de muibelzaak van Nollen dao begos. De moderne aanboe rechs op de Nuje Boelvaar is ouch drie keer nieks en sjleit wie ein tang op ein verke. Wie kint me ein markant sjtadspandj zo verklo..? Minnige sjtad zol hie greuts op zeen gewaes.De letste aansjlaag is de aardbeving van 13 april 1992 gewaes. Toen verdween de sjmeediedere aafwerking van de toepgevel. Det waas de keers op de taart. Ein logiese aafwirking in de heugte en letterlik ’t estetiese hoogtepuntj. Bie deze eine oproop aan de huidige eigenaer: Doot dao get aan! Laot dit hersjtelle!
Foto’s en teks: Guus Rüsing.
