In 1982 booj ’t Bisdom Remunj aan Rura aan om de haof van ’t vreugere Kartuzerklooster in beheer te naeme. ’t Lökde Rura om de Remunjse gemeinsjap werm te maken om ein sjtadspark aan te likke. D’r waerde meer es 700.000 (!) gölde biej ein gebrach om dit plan te realisere. Det geldj kwaam van partekelere, bedrieve (de Westrom moog mit ere geneump waere) en de euverheid. ’t Park is nao de oplevering in 1984 euvergedrage aan de Sjtichting Sjtadspark de Kartuus.
In ’t park sjteit ouch eine Ginkgo biloba ouch waal Jepanse noteboum of tempelboum geneump. Det Jepans klop neet gans. De boum kump oorsjpronkelik oet Sjiena en is dao heilig. In Jepan waerd de boum wie eine god vereerd. Hae is simbool veur zakes die neet verangere, leefde, touverkrach, tiedloos zeen en ein lank laeve. De boum is eigelik ein laevend fossiel dae al in de Jura-tied ( 200 toet 145 miljoen jaor geleje) greuijde. Hae euverlaefde zelfs de dinosauriërs en kint zelf zon 2500 jaor aad waere.
In ’t Weste is hae naodet de Amerikane op 6 augustus 1945 ein atoombom op Hirosjima gooide de boum van de haop gewaore. Op eine kilemaeter van de plaats van de insjlaag sjting eine tempel dae ram besjadig waerde. De Ginkgo dae, volgens tredisie, d’r naeve sjtong, begos korte tied later weer oet te loupe en begos es eerste weer te bleuje. Bie de boum sjteit noe ein gedinkplaat mit de teks: “No more Hiroshima”.
’t Waas de levelingsboum van Johan Wolfgang von Goethe (1749 – 1832). Bekind Duits sjriever, dichter en wetensjapper en filesoof. In zien laeve haet hae d’r hongerde gekweek en gepaot.
In 1812 sjreef hae ’t volgende sonnet veur zien geleefde Marianne von Willemer:
GINKGO BILOBA.
Dieses Baumes Blatt, der von Osten
Meinem Garten anvertraut,
Gibt geheimen Sinn zu kosten,
Wie’s den Wissenden erbaut.
Ist es ein lebendig Wesen,
Das sich in sich selbst getrennt?
Sind es zwei, die sich erlesen,
Dass man sie als eines kennt?
Solche Fragen zu erwidern
Fand ich wohl den rechten Sinn.
Fühlst du nicht an meinen Liedern,
Dass ich eins und doppelt bin ?
Dit gedich sjteit ouch op ein bronze plakette bie dae boum in ’t park.
Foto en teks: Guus Rüsing.
