Dr. Peter Josephus Hubertus Cuypers waerde in 1827 op de Hamsjtraot gebaore es negende kiendj van Joannes Hubertus Cuypers (1769 – 1858) en Maria Bex (1781 – 1874). In 1921 sjtörf hae in Remunj. Op angers plaatse is väöl euver hem gesjreve, dus hie allein dees korte tekst euver hem.
Altied waerd gekald euver de wirkplaatse van Cuypers. Dao waerde, mit respek gesjreve, kuns aan de loupende banjd gemaak. Cuypers waas neet allein arsjetek maar ouch ontwerper van alles waat dao bie heurde. Van heiligebeelde, kroonluchters, sjmeejwerk, muibels toet graafsjtein. Veur kesjteel De Haar te Haarzuilens zelfs toet ’t servies, ’t besjtek en de glazer aan toe. Ouch de sjablone veur de gesjilderde dekoraties waerde hie gemaak.
Naeve eine katteloges had Cuypers ouch eine toonzaal bie die wirkplaatse om klantje te laote kieke waat hae zoget allemaol kos make. ’t Is noe ongerdeil van ’t Cuypershuis. Hie kinne veer objekte zeen oet de vreugere ateljeejs. Hie is ouch ein zeldzaam punkteermesjien bie. Dit waerde gebroek om besjtaonde beelde te kopiejere of om modelle oet gieps, was of klei euver te bringe op hout of sjtein. Ouch kos dit apparaat vergote of verkleine.
Foto’s: Arend Masius.
Teks: Guus Rüsing.
