Peregrinus Vogels.

Foto: Guus Rüsing

In ’t sjtökse van maondig 27 julie 2020, “De genade van onzen Heeren Jesus Christus zij met u allen. Amen”, had ich ’t euver ’t Minderbroedersklooster aan de Perigrinus Vogelssjtraot. Euver dae naam zeen vraoge gekomme, waem det waas. Dökker waerd in de volksmondj Pieter Vogel-sjtraot gezach, mer det is dus neet korrek. De sjtraot, wie ze noe is, sjtamt pas oet ’t jaor 1909 en löp dwaars door de plaats wo sinds 1307 ’t klooster van de Minderbroeders loog, det waerde in 1863 gesjloop. Frappant is det op allebei de heuk ein pandj lik waat door Pierre Cuypers is ontworpe.

Peregrinus Vogels waerde in 1575 gebaore in Remunj. Zien elders ware Frans Vogels en Margaretha Pullen. Hae sjudeerde aan de Hogesjool van Leuve en waerde dao lisensjiaat in de Tejologie. Zien tesis, die hae verdedigde, droog hae op aan de magistjraot van Remunj. In ruul daoveur kreeg hae 13 Filipsdaalders.

Vogels waerde eers pesjtoor van Nederweert en daeke van Weert. Mer hae waerde ouch kenunnik van ’t Keizerlikke Sjtif van de Oos leef Vrouw in Aoke. Es zodanig waerde hae in de jaore 1639 – 1634 door de Hertog van Gulik beneump es aartspreester. In dees funksie waas hae ein saort van plebaan-daeke van de sjtad Aoke en president van ’t sinodaal gerech. In 1634 kreeg hae van de vikarus-generaal van ’t biesdom Luuk de opdrach ein ongerzeuk te doon nao de tuch en orde in versjillede kloosters. Det ongerzeuk waas op 9 junie 1637 aafgeloupe en hae deej aan nemes minder es de pauselikke nunsius in Kölle perseunlik versjlaag.
In 1641 waas d ‘r in Remunj ruzing ontsjtange tösse de kenunnikke Theodorus en Johannes Cox. Wie daeke Petrus van Kuyckhoven waas gesjtorve krege zie bie de verkezing veur eine opvolger allebei euveväöl sjtumme. Paus Innocentius X maakde hie ein inj aan door in 1648 Peregrinus Vogels es daeke van det kepittel te beneume.
Filips IV, de keuning van Sjpaanje, beneumde hem in detzelfde jaor toet biesjop van Remunj en det waerde door Rome goodgekeurd. Jaomergenog veur hem sjtorf hae, veur det hae es biesjop gewieijd waas, op 4 oktober 1649. Hae waerde in de perochiekirk van Sint Krissjtoffel begrave. De graafsjtein is d’r nog altied. ’t Waas dus keine kleine jong en had zo zien relasies.

Bie zien testement sjtoekde hae ein paar (sjtudie-) beurze in Leuve en Remunj. Dees ginge in de Franse tied verlaore mer det waerde door de minister in 1824 weer gekorrezjeerd. Det waerde in 1897 als volg door ein nuuj ministeriejeel besloet omsjreve: “De stichting voor de studie door Peregrinus Vogels ten behoeve der naaste bloedverwanten van den stichter met dien verstande, dat de inwoners van Roermond, Nederweert en s’-Hertogenbosch die aan den gestelde eischen van bloedverwantschap voldoen, het eerst in aanmerking komen, ingesteld wordt bij hersteld”.
In 1979 waerde dees sjtichting same mit de beurzesjtichting van Johannes de Lovanio (of van Leeuwen) onger ein daak gebrach. Op 31 desember 1999 waerde det de “Sjtichting 1443”, ’t jaor van de aajdste beurs. Volgens middeleeuws gebroek zeen de burgemeister en de pesjtoor nog altied, qualitate qua, besjtuursleje, ein tredisie van bienao zeshongerd jaor!

Teks en foto’s: Guus Rüsing.

Aanmelden nieuwsbrief
Cookieinstellingen