Dit is bekind es ’t gebaortehoes van de kunssjilder Henry Luyten (Remunj 21 mei 1859 – Braasschaat (Belsj) 21 jannewarie 1945). ’t Jaortal 1754 in de toepgevel duit dinke det veer ’t hie mit ein pandj oet de achteende eeuw te make höbbe. Mer ouch hie bedruug de sjien. Oet sjtökker oet ’t Hoofgerich van Remunj weite veer det in augustus 1489 Herbert van Franckenvoirt en zien vrouw Ida op ’t Zandt häör hoes bie de perochiekirk op de hook van de Vesserssjtaot belene bie Jacob Botteliers oet Weert. Die Vesserssjtaot van toen hit allewieles Sinterklaossjräötje. Dan blief ’t eine ganse tied sjtil. In junie 1557 ruult eine Johan Broeckmans dit hoes mit Jenke Gaetgens en zien vrouw Catharina veur anger zakes. Dan moog de buurman, Jan Graess de doorgank achter ’t hoes gebroeke omdet hae zellef geine achterom haet. Hae mot de gank waal euverkappe en ongerhaje.
In de volgende jaore waerd geregeld gesjpraoke euver ’t hoes “dair die schipper ire gaffel” boven hebben. De Broedersjap (gilde) van Sint Nicolaas kwaam hie geregeld biejein. Det ware de sjippers en de huurvaarders. In fibberwarie 1559 laote de Broedermeisters Wylm van Barlo en Johan Rijcken weite det de eigenaer, Jan Poell, ’t hoes, inklusief de gaffel, haet verkoch aan Jan Gaderts oet Karke. In 1566 komme veer te weite det Catharina, inmiddels witvrouw van Jenke Gaetgens, is hertrouwd mit Gelis van Kan. Dit echpaar verköp ’t witvrouwerech van ’t half hoes aan eine Korst van der Stegen en zien vrouw Anna. Dan, twee jaor later, kump eine Korst van Jan Poell teveursjien es eigenaer. Det is eine alias veur Johan Broeckmans junior, en dae naam koste veer al oet de ruul van 1557. Noe doe en dan ich!
In november 1588 bliek det Korst van der Stegen gesjtorve is. Toet dae tied komme in aktes regelmaotig ’t sjippersgaffel op de baoveverdeping te sjpraoke.
Dan komme veer ein paar keer de naam Jacob Rijcken taege in verbandj mit dit hoes. In Junie 1593 waerd hae same mit Johan Tissen, Goetze Rijcken en Vaes Aretz geneump es Meister van de Sint Nicolaasbroedersjap oftewaal ’t gilde van de sjippers en huurvaarders mit Sinterklaos es petroonheilige. De raeje det veer ’t noe euver ’t Sinterklaossträötje höbbe moog waal dudelik zeen. Daobie kump det in dit sjträötje ouch nog ein hoes loog det “Sint Nicolaas” hoot, döbbel op dus. Noe weit geer waal nog neet wiezo Kranport 1 ouch “De Waog”geneump waerd. Det kump eine angere keer.
Teks en foto’s: Guus Rüsing.
Dankbaar is gebroek gemaak van: http://www.janruiten.nl/klockenslagh/Roermond/Huisnamen/Huisnamen.htm#XTC, opgerope op 3 augustus 2020.
