’n Paar waeke trök sjtonge Jannie van der Heijden en André van Duin inens oppe Raodhoessjtraot in Neel, veur häör tillevizieprogramma “Denkend aan Holland”. Omdet zie in dit programma Nederlandj verkenne vanaaf ’t water, waas dit bezeuk nogal onverwachs: ze sjtonge midde-n-in ’t dörp, wo ’t innigste sjtruimende water door de Neelderbaek geit.
Bliekbaar haje die twee veur häör bezeuk aan Limburg ‘ne link gelag mit ’t “Rijke Roomsche Leven”, en wolle zie waal ‘ns kennis make mit ‘ne echte geistelikke. De produksiemaatsjappie kwaam via-via in kontak mit ‘ne echte Neelder jong, en dae hoofde neet wied te zeuke. Jannie en André lepe dus onger aan de kirktrappe pesjtoor Wilson Varela taege-n ’t lief. Meneer pesjtoor neujde de twee ontdekkingsreizigers oet nao waat hae de sjoonste vereniging van ’t dörp numde: sjötterie St. Urbanus.
Op ’t sjeetterrein waerde Jannie en Andrë opgewach door veurzitter Frans en ’t keuningspaar Rebecca en Pascal. Nao get gezjwaegel waerde André en Jannie oetgeneujd om zelf ouch ‘ns onger de sjeetboum te gaon sjtaon. Veur André waas de kennismaking mit dees historiese sjport neet om euver nao hoes te sjrieve: vermoedelik ligke de sjtökker van de sjeetboum toet aan de euverkantj van de A73 bie de boewmert. Jannie aevel wis metein al ’n paar bölkes van de reek te sjete.
Nao dees insjpanning vertrok ’t gezelsjap vanoet Neel nao de Veursjtad, wo Jannie en André zich in Zuid Frankriek waande: ’n good glaas wien, zjeudeboel en ’n sjtraolend zunke taege-n ein sjtrakblauwe loch. Wie Jannie al zag: in Limburg is ’t bienao altied good waer. Via de Sjteine Brök kwame ze bie häöre boot aan de Roerkade. Wie ouch Naan aan baord waas, vore ze de Maas op om in zudelikke richting volop te genete van de oetgebreide Maasplasse en de väöle natuurmonumente die Limburg riek is. Tiedes de oetzending waas te zeen det ze onger meer ’n bezeuk höbbe gebrach aan Maasbrach, Sjtaeveswaert, Thoor en ‘ne ambachtelikke sjlechter oppe Laak. Nao ’t nuuts waas dees oetzending ’t bes bekeke programma van de ganse aovend, mit mer leefs 1,5 miljoen miense die rechsjtreeks höbbe gekeke. Dit waere d’r ongetwiefeld nog ‘ne houp meer: miense die de oetzending höbbe gemis, of ’t geweun nog ‘ne keer opnuuj wille bekieke. Want Neel is prachtig oppe kaart gezat!
WijZijnMaasniel waas d’rbie wie dit illustere sjtel hie rondj leep, en haet van de gelaegeheid gebroek gemaak om plaetjes vas te ligke die nog nooit eerder vertoond zeen.
