Waterpötte ware de veurluipers van de pompe. Ein van de openbare waterpötte waas de Sint Krissjtoffelpöt veur de hoezer van de Kraanport en ein gedeilte van de mert.
In 1792 waerde besjlaote om de loje pomp, die d’r toen al sjtong, ein sjteine omhulsel te gaeve. Dees pomp sjting toet 1925 in de insjpringede hook van de mert richting Kraanport. Toen waas ze neet meert neudig door de koms van de waterleijing en aafgebraoke. Vervolges kwaam ze terech in de haof van mr. Oor aan de Kepelderwaeg.
De pomp waerde in 1967 gerestereerd en op ’t pleintje in de Neersjtraot taegeneuver ’t Roersentrum geplaats. Dit waas eerder eigelik ’t terrein van de Sint Mecheelspomp, die waas van geetiezer, en in 1929 waas gesjloop. Ze waerde in gebroek gesjteld door de burgemeister van toen: Mr. Jan Daniëls en goof ech water. Det haet aevel neet lang gedoerd.
Op de pomp sjteit ein sjteine beeldje van Sint Krisjtoffel, det is ein replika, ’t orizjeneel sjteit in eine binnehaof van ’t sjtadhoes.
Meistens ware zo’n dertig hoezer aangesjlaote op eine pöt. De bewoners moste zellef de köste veur ’t sjlaon en ’t ongerhaad betale. Daoveur krege ze van ’t sjtadsbesjtuur eine belastingaansjlaag. Rondjom zonne pöt ontsjtonge sosjiaal verbinjinge, ein gemeinsjap. Noe nog heite in Remunj väöl wiekvereniginge “de …pöt”. ’t Goje Remunjse waord veur “wijkagent” is dan ouch “pötplies”.
Foto en teks: Guus Rüsing.
