Ut Remunjse Kollege haet de gemeinteraod veurgesjteld óm de 5 miljoen veur ut coronafonds good te keure. Meer dan 5.5 oer höbbe de waordveurders neudig gehad om de ups en downs van de coronacrisis te beneume. Neet genóg tied want dinsdagavond is de tweede runj van ut debat. Volges de volksvertegewoordigers van de oppositie geit ut neet good en de volksvertegewoordigers van coalitie prieze alles de hemel in. Ut fonds waerde verdedig door wethaaier Marianne Smitsmans, via ein pleidooi det meer euver boete Remunj ging dan euver Remunj. Auch reep Marianne op óm veural vertroewe te höbbe in ut kollege want diej zorgde der waal veur det ederein aan zien trekke zal kómme. Laot mich noew in det létse gein inkel vertroewe höbbe.
Det kump óm det ich gevoed waer door alles waat der in Remunj allemaol fout geit. Ze kinne nog neet twintig euro euver make nao emes aan de ermooigrens zónger det zich dao tich ambtenaere mit bemeuie. De klachte van zelfsjténjige, bedrieve, sjportsjole, danssjole, sjportvereniginge en geweun burgers loupe de klauwe oet. Gein fetsoenlikke communicatie en dan noew rope ‘veer regele ut waal’. De zes Sinterklaoze in ut sjtadhoes gaon mit gét winselieskes aan de sjlaag. De volksvertegenwoordigers kriege dan weer de zjwarte piet as ut neet good geit. Ja, en dan kieke de raodsleeje van de coalitie weer de angere kantj oet en moog de rés de burgers oetligke wohróm det ut fout geit.
De zelfverheerliking van de kollegeleeje is verperpelik. Miljoene gemeinsjapsgeldj höbbe ze al der door gejas de létste jaore en noew meine ze auch nog ut alleinréch te höbbe om de sjrabbers, die van de gemeinsjap zeen, in häör eentje te verdeile. Ut moog waat mich betröf ein miljoen meer zeen as de hoogste nood maar waert opgelós en as de gemeinteraod dao 100% controle op haet. Maar deze surrogaat-democratie mót opheure. Det sjteeds de mach van ut getal bepaald waat der gebeurd of ut noew good is of sjléch. Al doon ze mich vief móndjképkes óm, mien protés zal der door haer dringe. De arrogantie van de mach is neet allein in Remunj aan de geng woh eine burgemeister häör euverdreve handjhavingswerk auch nog verdedig maar auch in Mesjtreech woh de machhöbbers ein vernietigend rapport euver häör van de raekenkamer toet ein fabeltjeskrant verheffe. Laot zowel lokaal as provinciaal CDAers in ut machsblok zitte. Zal gein toeval zeen.
Ut óngerein baantjes en opdrachte toesjpele blief actueel. Allein waere der noew zogenaamde vriejbreeve biej geleverd. Auch nationaal zal de ‘grote verlosser’ dae ós nao ut belaofde landj leid zich nog waor mótte make door ein belofte nao te kómme. Doezjend euro veur elke burger sjteit nog sjteeds aope. Nooit eerder waas der ein baeter mement om det oet te betale dan noew. Maar ut zal waal net zo gaon wiej ut kwartje van Kok det verdwene is in de tésse van multinationals. Nae mien vertroewe in bepaalde politieke leiders is gezak toet ut deeptepunt en daoveur neum ich ut surrogaat-democratie. Maar ich blief al vaegend door ut politieke landsjap de zake volge en mich sjterk make veur ós sjtad en zien bewoners.
Toet vaegs,
Uche Sjtraotvaeger,
Dré.
