Maondig 29 junie 2020. Arsjetek Speetjes (1), Sjuiteberg 45

Foto: Guus Rüsing

Johannes Hubertus (ouch Jean of geweun Janne) Speetjes waerde op 4 oktober 1848 gebaore in Remunj en sjtorf op 16 oktober 1912 in Antwerpe. Zeen weeg sjting op de Zjwamaekerssjtraot, wo zien elders ein kefee en eine winkel hadde. Die elders ware Peter Mathijs Speetjens en Odilia Steuns. Oze Jean ging nao de opleiding boekunde aan de Akkedemie in Antwerpe. (Remunj, Antwerpe en arsjetekte;  det kump dökker veur!). Hij haolt dao in 1878 eine Prix d’Excellance. Hae ging wirke bie de gemeintewerf van Rijssel (Lille), Frankriek. In 1880 kwaam hae es zelfsjtenjig arsjetek nao Remunj. Tosse 1890 en 1900 pendelt hae tösse Remunj en Antwerpe. Dao troewt hae in oktober 1897 mit Maria Dymphna van Gennip. Zie kriege same veer kienjer: drie dochters en eine zoon. In Remunj wone ze aan de Munstersjtraot nummer 2. In 1904 vertrekke ze weer nao Antwerpe.

Op 17 april 1901 waerde vergunning aangevraog veur ’t boewe van ein woonhoes mit winkel, remise (koetshoes) en sjtalling veur de paerd door Johann Matthias Kranenpoot en zien vrouw Katharina Netten. Volgens eine ingemetselde sjtein in ’t portgeboe waerde de eerste sjtein gelag op 15 augustus 1901. Det jaortal sjteit ouch in sjtuukwerk in de toepgevel. In 2002 kreeg ’t de sjtatus van Rieksmonement. De Rieksdeens zaet in ’t offesjeel monementeregister det ’t geboewd is in de “vormentaal van het Eclecticisme”. Waat det inhilt moge ze mich ins oetligge. Veur mich is ’t neo-klassisisties, in ein waal heel euverdreve drökke oetveuring. Speetjes boede nog väöl meer in Remunj. Det zuut d’r allemaol get röstiger oet. Dao euver eine angere keer.
t Pandj waerde jaorelank bewoond door de femelies Franquinet en  Meisters. Lowie I Meisters waas onger angere bekind es Vors van vastelaovesvereniging D’n Uul (van 1948 toet 1960). Noe zeet d’r antikaer Berden in.

Foto en teks: Guus Rüsing.

X

Meld je nu aan voor onze nieuwsbrief
Aanmelden