Nao zien sjtudies kump Frans Dupont in 1906 trök nao Remunj es zelfsjtenjige arsjetek en haet zien ketoor en woonhoes aan de Vinloseport nummer 7. Hae is dan 25 jaor en eine man van de werreld. Hae haet es ein van de eerste tillefoon, nog veur de burgemeister en dokters. Det pas bie hem mit ziene zilvere wanjelsjtek. Hae brink de sjarme van de Art Nouveau, de Jugendsjtiel, en daomit de sjpeelsigheid van de grote steej, mit nao Remunj. Wanneer krieg hae eine verdeende sjtraotnaam?
In de kattelieke sjtad van Pierre Cuypers hat hae al twee jaor eerder (1904) zien fesitekaertje aafgegaeve mit ’t ontwerp van Villa Josefina aan de Kepelderwaeg. De sjtiel mot toen ein sensasie zeen gewaes. Dae sjtiel pasde waal bie de opdrachgaever, det waas de heer Jean Wolfs. Nao begos te zeen mit eine kanepee haet hae in de “Belle Epoque” fortuun gemaak mit ’t eerste hippodroom van Nederlandj. De bezeukers koste dao paerdrieje in ein sjieke tent mit sjampaanjebar. Dao mot geldj mit verdeend zeen gewaes. Hae beheurde dan ouch toet waat de joernalis Piet Tummers neumde “de kirmesadel” van Remunj. Anger bekinde name zeen Benner, van Bergen, Kunkels en Vincken. Hae waas getrouwd mit ein maedje Xhaflaire, oet ein Belzje kirmesfemilie, aafsjtammelinge van Franse Hugenote. Ouch Karel Benner en Sander van Bergen ware mit ein maedje Xhaflaire getrouwd.
Lange tied is de villa bewoond gewaes door de femilie Evers van sjteinfebriek Evers in ’t Hateboer. Dees bestong van 1874 toet ongeveer 1957 en is in 1968 aqafgebraoke. Daomit is ’t ouch ’t gebaortehoes van Léon Evers, de bekinste ambtenaer van de Burgelikke Sjtand van Remunj es opvolger van ’t Vödje van van Appeven. Dae haet zoget half Remunj getrouwd.
Mit respek veur ’t Jugendstil interiejeur is de villa verboewd veur landjsjapsarsjetekteburo Taken.
Guus Rüsing
