’t Moog ein unikum geneump waere es ein book euver ’n begraafplaats eine derde drök belaef. Zeker veur ein sjtad zo groot es Remunj. Toch is det gebeurd mit ’t book van John Vaessen euver “D’n aje kirkhaof”in Remunj. Det is niet zo mer. Veer kalle euver ein van de aajdste gemeintelikke begraafplaatse in ’t landj oet 1785. Remunj waas toen Oosterieks en keizer Josef II waas de baas.
In ’t book komme zo’n zeshongerd grave en graafkelders aan de orde. De krach van ’t book is det veer neet allein bekinde dinger taegekomme wie ’t “graaf mit de hendjes'”. Veer komme zo’n viefteenhongerd (!) laevesbesjrievinge taege van miense die hie zeen begrave of biegezat. Veer make kinnes mit miense die zoget vanaaf 1750 bies noe of de ein of anger meneer verbonje ware mit Remunj, hie woonde of wirkde en zo mit de gesjiedenis van de sjtad gesjreve höbbe. Veer komme rebrieke taege wie kloostergrave, arsjetekte, dokters, de oorlog en de Remunjse kirmesadel.
Es geer in de zomerfekansie get wilt laeze euver dit sjteine arsjief van biena drie eeuwe kin ich ’t uch van herte aanbevaele. Vrundj John Vaessen hat d’r zien zeel en zaligheid in gelag en det is good te merke.
Te koup bie de Remunjse bokewinkels. Vaessen, John: Dood, maar niet vergeten. Graven en grafkelders op ‘den Aje Kirkhaof in Roermond. Roermond 2019, derde uitgebreide druk. Stichting Oude Kerkhof Roermond. ISBN/EAN 979-90-811279-5-0.
Foto en tekst: Guus Rüsing.
