Dit is bekind es ’t gebaortehoes van de kunssjilder Henry Luyten (Remunj 21 mei 1859 – Braasschaat (Belsj) 21 jannewarie 1945). ’t Jaortal 1754 in de toepgevel duit dinke det veer ’t hie mit ein pandj oet de achteende eeuw te make höbbe.
Giester sjreef ich al det dit hoes väöl ajer is. Ich gaon wiejer mit ’t verhaol en veer zitte dan in ’t jaor 1593. Jacob Rijcken en zien vrouw Agatha naeme de rentebreef van 200 gölje euver womit ’t hoes “In gen Waeghe” sinds jannewarie 1568 waas belas. Dae Jacob is mer veur ein deil eigenaer van dit hookhoes. Oet ein akte van september 1597 waere veer get sjlouwer: Eine Gerhart van der Stegen dreug zien kiejndsdeil euver aan aan ziene zjwaoger Jacob Rijcken. Dae koste veer al, mer hae bliek intösse waal ouch hertrouwd te zeen mit Grietgen Stockbroicx. Weer waerd gezag det ’t ’t hoes is wo baove de sjippers häöre gaffel höbbe.
Noe waerd ’t sjpannend en internasjionaal: Dae Gerhar(d)t van der Stegen woont in Cholchester (Ingelandj) . Hae haet ein dochter Emerentiana in Dordrech en det verköp in juni 1603 zien derde deil in ’t hoes aan ziene ome Jacob Rijcken.
In mei 1597 waas ’t Sjippersgilde mit daezelfde Jacob Rijcken al euverein gekomme det de zölder ein nuuj floer neudig had. Dae sjtelde det sjteeds oet De broedersjap leet ’t zellef reperere ging mit hem veur ’t gerech veur de köste.
Toet ’t begin van de zeventeende eeuw waerde ’t hoes ouch gebroek es maelwaog. Onger angere weite veer dit oet 1611 toen de vrouw van van Rijcken “ïn de meelwaghe” veur ’t Hoofgerich van Remunj verklaorde: “und dat sij deselver gewaecht heeft”. (Hoofdgerecht inv.nr. 381-akte 29.).
Teks en foto’s: Guus Rüsing.
Dankbaar is gebroek gemaak van: http://www.janruiten.nl/klockenslagh/Roermond/Huisnamen/Huisnamen.htm#XTC, opgerope op 4 augustus 2020.
