D’n Uul trap vastelaovend aaf mit “Aad Op Nuuj”

’t Is weer bienao zo wied: kommende maondig geit ’t vastelaovessezoen weer van sjtart. Ouch dit jaor zal D’n Uul dit op zonjigaovend 10 november weer tradisjoneel in de boeteloch doon mit ’t evenement “Aad op Nuuj”. In taegesjtelling toet Mesjtreech vindj D’n Uul namelik det de vastelaovend onger de sjterrehemel geäöpend mot waere. Om kloksjlaag 00.00 oer waerd ’t sezoen seremonjeel geäöpend.

Tiedes “Aad op Nuuj” zolle kommende zonjig väöl bekinde artieste de äöpening van de vastelaovend komme viere onger de gezellige paraplutent. ’t Belaof ein sjpetterend begin van ’t sezoen te waere, neet allein mit Remunjse artieste wie Tobias Berger, Roy Selder en netuurlik Big Benny, mer ouch mit Spik & Span, Björn en Mieke en de Toddezek!
D’n Uul zelf zal ouch flink oetpakke mit de prizzentasie van de nuje Uulesjlager, de Prinsekepel en de damesgarde mit häöre nuje showdans.

Wie det geer wit, waerd ’t Munsterplein dit jaor verboewd, en daorom waerd dit jaor oetgeweke nao de Mert. Volgend jaor haop D’n Uul mit “Aad op Nuuj” weer trök te zeen op ’t vertroewde nes. Toch geit ’t Uulemotto van dit sezoen zeker op, en haje ze ouch oppe Mert, mit kattedraal en Sjtuf op de achtergrondj, “De kirk in ’t midde”!

“Aad op Nuuj”, zonjigaovend 10 november vanaaf 19.30 oer, oppe Mert in Remunj!