Hotel en Grand Café De Pauw in Remunj is door de bezeukers van de populaire website Eropuit in Eigen Land gekaoze toet Beste Hotel van Nederlandj. De Eropuit in Eigen Land-pries waerd jaorliks oetgereik aan de meis favoriete toeristische besjtumminge in versjillende kattegorieje, en waerd bepaold door ’t pebliek. Hotel De Pauw bleek de meis favoriete besjtumming in de kattegorie Hotels. In eder rubriek krieg de winnaar ’n trofee, ’n sertifikaat en ’n top-posisie op de website. De trofee is dees daag names ’t sjtadsbesjtuur oetgereik door Angely Waajen aan hoteleigeneer Peter Brouwers.
Peter Brouwers is zeer vergöldj mit deze pebliekspries. “Veer zeen erg verras! Veur os is dae pries de keers oppe taart van ’n geweldig sezoen. Perseunlik zeen ich dae pries es eerste es ’n meneer van erkinning en waardering veur de inzat van os mitwerkers. ’t Guf aan det os gaste heel tevreje zeen. De ligging van os hotel in ’n gezellige monumentaal omgaeving, dun bie ’t outletcenter, winkelhert en Maasplasse sjprik netuurlik biezonjer aan. Os hotel is ’n prima oetvalsbasis veur allerlei oetsjtepkes, en guf door de sjtadse lokasie ouch zat belaeving. Maar suukses is altied sjterk aafhankelik van ’t personeel: de klantjvruntjelikke professionals die de sfeer en gasvrieheid bepaole. Daonaeve mos-se netuurlik blieve vernuje en klantje blieve verrasse.”
Peter Brouwers zuut de pries dan ouch es ‘ne beheurlikke opsjtaeker veur toeristisch Remunj: ’n nuuj bewies van kwaliteit. Angely Waajen ongersjtreep det: “Toerisme is erg belangriek veur Remunj. Es sjtadsbesjtuur zeen v’r daorom ouch greuts op alle ongersjeijinge en predikate die de ongernummers van Remunj in de wach sjleipe. Hotel en Grand Café De Pauw is al jaore lank van vaste waerd veur os verbliefsmeugelikhede, en eine terechte winnaar van dees trofee van Eropuit in Eigen Land.”
