Opnuuj erkinning van ’t Limburgs es sjtreektaal

Aafgeloupe woonsdig 6 november waerde in de Maaspoort in Venlo ’n symposium gehaje euver sjtreektale. Onger de aanwezige ware ouch minister Raymond Knops van Binnelandse Zake en Keuninkriekrelasies (BZK) en gedeputeerde Ger Koopmans van de provincie Limburg. Zie höbbe same ’n convenant geteikend veur erkinning van ’t Limburgs es sjtreektaal, en höbbe belaof dao noe nog meer wirk van te make. Dees euvereinkoms is ’n erkinning en opnuuj ’n bevestiging van ’t Limburgs es volwaerdige, zelfsjtenjige regionale taal in Nederlandj, en ongersjtreep ’t belang van ‘os plat’ veur de Limburgse cultuur en identiteit. Mit dees euvereinkoms sjpraeke riek en provincie aaf om same te wirke aan ’t behaje, aan ’t bevordere van ’t gebroek, en aan ’t sjtimulere van de posisie van de Limburgse taal.

Aevegood sjteit ’t Limburgs onger drök, doordet sjteeds minder eljers häör kinjer in ’t plat opvoede. “Dit kint komme doordet d’r sjteeds meer gemingde huwelikke zeen”, zaet de provincie Limburg. “Veer zeen ein aope provincie mit väöl miense oet de res van ’t landj, oet de res van Europa en zelfs dao boete, die hie haer komme om te laeve, te wirke en ’n gezin te sjtichte”.
’t Behaad van os taalriekdom is belangriek veur de Limburgse gemeinsjap, en heel good veur de taalontwikkeling van kinjer. De euverheid kint neet allein sjtaon bie ’t benaodrökke van det belang. Daorom geit de oetwirking van dees euvereinkoms oet van samewirking veur det belang, door euverhede, maatsjappelikke en culturele partieje én netuurlik de inwoners van Limburg. ’n Aantal betrokke luuj oet ’t ongerwies, kinjeropvang, bibliotheekwirk, ’t culturele veldj en sjtreektaalorganizasies sjtonge daorom (symbolisch) achter de twee ongerteikeneers. Op ’n canvasdook mit de titel “Veer sjtaon achter ’t convenant” zatte zie ouch häör handjteikening, en belaofde ze zich in te zitte veur de Limburgse taal. De rol van ’t Hoes veur de Kunste Limburg

’t Hoes van de Kunste is van erg dunbie betrokke bie dees euvereinkoms, omdet de sjtreektaal ein van häör disciplines is. “Es provinciale sjteunfunksie helpe veer vanoet beleidsmatige, ontwikkelingsgerichte en verbinjende rol in ’t veldj van de sjtreektaal. Same mit de aangesjlaote sjtreektaalorganizasies Veldeke Limburg en de Raod veur ’t Limburgs, zitte veer os sjouwers onger ’t behaje van de Limburgse taal.”

Gedicht “Oos Taal”

Dichter Wim Kuipers haaj sjpesjaal veur dees gelaegeheid ’n gedich gesjreve mit de titel “Oos Taal”. Dit gedich ongersjtreep de krach van de Limburgse sjtreektaal. “Oos Taal” waerde door Veldeke Limburg aangebaoje aan minister Knops en gedeputeerde Koopmans. ’t Gedich geit same mit vief QR-codes: ’n verwiezing nao ’n ingesjpraoke audio-opname door Wim Kuipers zelf, en veer koppelinge nao vertalinge in ’t Nederlands, Frans, Duits en Ingels.