Donderdaag 7 november haet de raod 14 oer vergadert. Vanaaf minuut ein waas ut al kómmer en kwel. De oppositie had ein anger boodsjap dan de coalitie. Ut waas ein en al zelfverheerlijking waat ut college betröf. Waat moog Remunj bliej zeen det ze diej toppers in hoes höbbe. Rianne Donders is eerste burger en worstelt neet allein mit zich zelf maar ouch mit häör taak. Veurzitter van ut college en veurzitter van de raod zeen is neet mékkelik. Häör metgezelle in ut college kloppe biej gebrek aan complimente zich zelf op de bors.
De goodbedoelde raodsleeje ten sjpiet in ut Remunjse Kremlin heerse dictoriale toesjténj. Ut college wohl zich mit ein Jantje van Leide der vanaaf make en det pikte de raod neet.
Nao vief oer zoot de eerste ronde der op. Frans Schreurs kreeg nog ein motie van afkeuring aan zien bóks die ut neet haolde. Want ut machsblok in de Remunjse politiek haet óngerling aafgesjpraoke ondanks blunders, mismanagement en incompetentie zich de handj vas te haaie. Det waerde ut ergste zichbaar biej de besjpraeking euver de biejeinkómse van dees coalitie veur de verkeezing van 2018 om de LVR oet te sjloete. Ze haaie zich óngerein vas. Ze höbbe immers allemaol same naeve de pot geplas. Maar ut begint te sjtinke en de publieke opinie keert zich taege dit machsmisbroek.
De passion haolde de eindsjtreep omdet de raod in meerderheid ut college beperkte in de oetgave. Omdet volksvertegewoordigers sjnappe det der luuj zeen diej ut prachtig zoude vinje as de passion in Remunj kwaam waerde dao raekening mit gehaaie. Maar de passion nao Remunj kin as ut maar biej de biejdrage van Remunj blief zo as diej noew is beraekent. De 900.000,- waerde door biejdrages van derde en reserveringen ruum gehalveerd.
Ut kruujts kin oet de kas…
Mich is nog gevraog of ich ein rol wohl höbbe maar höb gepas want ich höb ein breurke dood aan sjienheilige. Ich zal waal veuraaf de sjtraote sjoonvaege zodet de hoofrolsjpelers gein voel bóks kriege.
De Sjtraotvaeger.
Dré.
