Blog – De Sjtraotvaeger – Aafgeloupe waek meinde burgemeister Rianne Donders zichzelf ein deens te bewieze door via tante Bet (laes De Limburger) weer ins oet te haole nao Jos van Rey en de LVR. De reacties in ut Remunjse in de richting van de eerste burger ware neet mals.
Gertie Driessen waas Rianne Donders wederom van deens en sjreef eine advertorial veur de Remunjse burgemeister. Eine Remunjse burger leet zich ontvalle ‘Ich wis neet det Gertie Driessen ouch advertenties verkóch!’. In de deal mit De Limburger zote bliekbaar nog gét bonusse want sangerdaags deeje ein paar scribente ut nog ins lichjes euver. De laezer wit óngertösse wiej ut sjpel van oet Mesjtreech gesjpeeld waert. Jos van Rey blief in de ouge van de hoofdredactie ein gewild objéc om op te jage. Ze vloere Jos waal ins maar deze vechter sjteit elke keer weer op veurdet der toet 8 geteld is. Hae geit geweun door mit de volgende runj in ut belang van de Remunjse burgers en de óngernaemers. Juus det létse sjtik de subjectieve joernaliste in Mesjtreech.
Jaomer det Rianne Donders zichzelf eine dieke voldoende guf. De burgeriej zuut det anges en teikent mit hóngerde de petitie die ónger de noemer ‘Genoeg is genoeg’ te vinje is op sociale media. Donders is de eerste burgemeister in Nederland die kin zégke ‘ich höb eine eige petitie’. De fractieveurzitters in Remunj ‘ich neum häör dondergode’ haaie häör nog in ut zadel. Eine klankbordgroep haet ein sjtök gemaak euver ut functionere van Donders. De raod moog det ónger groot geheim inzeen en daonao ein handjteikening zitte det ze nieks nao boete bringe.
Geer sjnap det ich ut neet gaon inzeen want as ich daonao gét sjrief höb ich ut ÓM aan de deur sjtaon. De coalitie zal ouch noew de rieje gesjlaote haaie en Donders sjteune. Ruum dertig procent sjteunt häör neet. Mit ein kleine meerderheid zou eine doorsjnee politici neet langer wille blieve maar Donders kin neet anges. As ze neet waert herkaoze is de sjöldige al bekind. Ze zal ouch ‘hoe dan ouch’ nieks geleerd höbbe van de aafgeloupe vief jaor. Zelfreflectie is häör vraemp. Noew der crisis is in de waereld heers is de eerste burger van Remunj absent en moog de loco Marianne Smitsmans as waarnaemer de sjtad biej sjtaon.
Haet Rianne al aafsjied genaome?
Toet vaegs,
Dré Peters, uche Sjtraotvaeger.
