Det veer ‘pas op de plaats’ mótte make is veur de eine mékkelik en veur de angere neet te doon. Miene daag zuut der gans anges oet as veur inkele waeke geleeje. Väöl zake zeen vraemp. Naeve mien verplichte oetsjtépkes mit de hóndj in gebiede woh ze amper emes taegekumps kóm ich gaar oet neet boete.
Miene IPad en tillefoon zeen mien hulpmiddele. Ich óngerhaai digitaal ketakte mit ut sjtadhoes, mien vereniginge, burgers en mit de politiek. Per daag beanjwaord ich de neudige vraoge van burgers en woh ich gein anjwaord op weit ligk ich diej veur aan miense diej det waal wete.
Ich gaef ouch regelmaotig advies woh ze häör anjwaord kinne kriege op vraoge diej complex zeen. Gluif mich de angs regeert. Regelmaotig krieg ich eine messinger op de meis gekke tieje. Miense wille aeve ketakte en zeker alleinsjtaonde miense. Aeve same van gedachte wissele en dan merk ze det de angs biej väöl burgers aanwezig is.
Óngernaemers höbbe ut moeilik en ouch werknaemers dinke nao euver häör baan. Dao is geine dae kin zégke det ut hem neet raak. Gluif mich ut coronavirus leut zien sjpaore hil lang nao. Thoes, op ut werk, in de vereniging en woh dan ouch.
Net nao de paus gekeke in ‘Ut gebed veur de miensheid’. Loeiende klokke mit op de achtergróndj de sirenes van de ambulances. Toch preufde ze sjtilte. Ein Sint Pietersplein zónger volk en zo mót ut noew helaas zeen.
Ich sjtaon sjtil biej de miense diej thoes allein zitte te piekere.
Zeen der miense diej ein helpende handj wille toejstaeke doot det danne. Laot uch neet taege haaie. Det kin ouch door de greune poster op te hange as ze hulp wils beeje. De rooie poster is der veur as ze hulp kins gebroeke. Dao hoof éch gein tillefoonnummer op. De poster zaet genóg.
Blief zo väöl meugelik weg woh geer neet hoof te zeen en sjtaek ein helpende handj oet nao diej miense diej ut neudig höbbe.
Dees waek sjloet ich aaf mit sjtil te sjtaon biej de miense diej vechte taege dit virus en degene diej gevóchte höbbe en de sjtrijd höbbe verlaore.
Miene dank geit ouch oet nao al diej luuj diej ut hert op de gooi plaats höbbe. Dank veur uche inzet veur de medemiens.
Toet vaegs,
Uche Sjtraotvaeger Dré.
