Oproop: zit eine baer veur de raam!

Foto: Alexas_Fotos via Pixabay
Baerejach in de Remunjse wieke: kinjer zeen euveral nuuj baere versjiene.

In deze tied det alle kinjer verplich toes zitte, mosse toch get nuujts bedinke om de jeug bezig te haje. Daobie motte dan ouch nog ‘ns de regels van de euverheid gevolg waere. “Baerejach” is noe dé oplossing!

Dit “sjpel” is euvergewejd vanoet Australië. ’t Is gebazeerd op ’t populaere printebook “Wij gaan op Berenjacht” van Michael Rosen en Helen Oxenbury.
Baerejach is ’n sjpel wobie kinjer, die mit pap en mam door de wiek wanjele, zo väöl meugelik baere motte vinje. In plaats van allein mer get te loupe, waere de kinjer noe de ganse waeg bezig gehaje. Ze motte zeuke wo baere te vinje zeen: achter de rame, mer ouch in häöfkes en op balkons.
Sjteeds meer miense plaatse eine baer veur de raam (of op ’n anger zichbare plaats), en es de kinjer zo’ne baer vinje, moge ze det aafsjtrepe op ’n sjpesjaal kaart.
Ongertösse zeen d’r al versjillende saorte aafsjtreepkaarte te vinje, mit allemaol versjillende meugelikheje, beveurbeeld 40 baere zeuke of kieke wieväöl versjillende kleure baere desse taege kumps. D’r zeen zelfs al bedrieve en organizasies die ’n prieske besjikbaar sjtelle veur de beste sjpotters.

D’r zeen ouch al versjillende facebook-groepe in ’t laeve gerope, in ’t ganse landj. De landjelikke groep ” Berenjacht in NL” waerd mit de daag groter.
In Remunj is de fb-groep “Berenjacht in Roermond en omstreken” in ’t laeve gerope, dae in ’n paar daag al bienao doezjend leje telt.
Deze groep is deils bedoeld veur miense die ‘ne baer veur de raam (wille) plaatse. Door ’n foto te make en de sjtraot door te gaeve, waerd deze baer toegevoeg aan ‘ne plattegrondj mit alle baere van Remunj en omgaeving.
De groep is ouch bedoeld veur miense mit kinjer die wille gaon wanjele. In de groep zeen versjillende aafsjtreepkaarte te vinje. En door te kieke oppe plattegrondj kump m’n achter de sjtraote wo baere te vinje zeen: zo wet g’r zeker det g’r ouch ech baere taege komp.
Melj uch aan bie deze groep, en kiek wie de baere Remunj euversjpeule!

V’r winse uch sjoon waer en väöl plezeer tiedes de baerejach!
En dink daobie ouch aan de richliene: haaj genog aafsjtandj en bön veurzichtig!

Aanmelden nieuwsbrief
Cookieinstellingen