Vandaag, 12 mei, is ’t de Internasjonale Daag van de Verpleging. Det is de verjäördig van Florence Nightingale. Dit jaor heel bezunjer omdet ’t de tweehongerste is. Waereldwied waas 2020 dan ouch door de WHO (de Waereldgezonjdheidsorgenesasie) oetgerope toet ’t Jaor van de van de Verpleegkundige.
Florence Nightingale (Florence, 12 mei 1820 – Londen, 13 augustus 1910) waerde gebaore in rieke, aristokratise Ingelse kringe. ’t Waas dan ouch neet vanzelfsjpraekend op te komme veur erm luuj, kranke en gewonje. Taege de zin van zien femilie zoot ’t ziene kop door en ging op ein saort van sjtudiereis nao de diakonesse van Kaiserswerth, noe Düsseldorf-Nord, en de begiene van St. Vincent de Paul bie Peries. Truuk in Ingelanjd begos zie ein klein krankehoes te reorganisere en waerde daodoor aangekeke es pionier van de modern verpleegkunde.
Toen bleek det d’r in de Krimoorlog miensonwaerdige sitewasies ware onger de Britse sjoldaote ging zie dao mit 38 verpleegsters haer. Ze kwaam terech in Scutari, ’t asiatise deil van Istanboel. Allewieles hit det Üsküdar.
In 1907 kreeg Florence, es eerste vrouw, de hoog Britse keuninklikke ongersjeijing van de Order of Merit.
Omdet zie in de Krimoorlog döks sjnachs rondjging mit ein luch waerde zie bekind es “De vrouw mit de luch” (The lady with the lamp).
Door de Corona-crises haet deze daag ein waal heel eigenaardig karakter gekrege. Deep respek veur alle verpleegkundige en miense in naeveberoepe. GRATIAS TIBI VALDE!
Teks: Guus Rüsing.
