De Remunjse arsjetek Frans Dupont waas ouch ontwerper van dit sjitterende Jugendsjtil pandj in de Neersjraot. Oorspjronkelik waerde ’t geboewd es graasj veur Hotel Lion d’Or, mit ein woonhoes. In ’t fronton baove de grote port sjting dan ouch heel greuts gesjilderd “Garage du Lion d’Or”. Die teks is jaomergenog noe neet meer te zeen.
“Hotel Lion d’Or” oftewaal “De gouden Leeuw” waas in ziene tied ein van de baetere hotels van Remunj. “t Had dan ouch de luukse van ein eige graasj waal neudig. D’r zeen beveurbeeld foto’s bekind det de wage van de toendertiedse Keuneging van Roemenieje veur de deur sjteit. In ’t geboe van ’t hotel zit noe de sjtadsbibliejoteek. In de graasj zoot lange tied de zeilmaekerie van de firma Bell.
Frans Dupont (1880 – 1955) haet väöl hoezer in Remunj ontworpe en verdeend meer erkinning es emes dae ein sjtök van ’t beeld van Remunj van noe bepaold haet. Det is waerd eindelik ins ein sjtraot nao hem te neume!
Ouch teikende hae ’t eerste plan veur de oetbreijing van de sjtad mit ’t Remunjse Veldj, ’t Sjtraoteplan rondj de Hendriklaan is van zien handj.
Profeties waas hae wie hae sjtelde det ’t sjpaor waal ins probleme kos gaon oplevere in de verbinjing tösse de sjtad en die nuuj wieke. Hae sjtelde dan ouch veur de sjpaorrils tösse Lerop en Leve op eine diek te likke zodet d’r genog ongerdoorgeng gemaak koste waere. Noe zitte veer mit d’n ozel van mer twee tunnels en ein viejeduk. De breer op de Sjlachhoessjtraot is eine ramp en dae op de Kepelderwaeg ein regelrech verkeersobsjtakel. Hadde ze toen mer nao hem geloesterd.
Foto en teks: Guus Rüsing.
