Nao zien sjtudies kump Frans Dupont in 1906 trök nao Remunj es zelfsjtenjige arsjetek en haet zien ketoor en woonhoes aan de Vinloseport nummer 7. Hae is dan 25 jaor en eine man van de werreld. Hae haet es ein van de eerste tillefoon, nog veur de burgemeister en dokters. Det pas bie hem mit ziene zilvere wanjelsjtek. Hae brink de sjarme van de Art Nouveau, de Jugendsjtiel, en daomit de sjpeelsigheid van de grote steej, mit nao Remunj. In de kattelieke sjtad van Pierre Cuypers hat hae al twee jaor eerder zien fesitekaertje aafgegaeve mit ’t ontwerp van Villa Josephina aan de Kepelderwaeg. Ronj liene, plante- en blomemotieve, dus get nuujts. Veur dae tied ein prestiegeprojek.
Aan de Vinloseport höbbe zien dochters Wilhelmina (Mimi) en Maria nog lang gewoond. In 2002 verhoesde de lets laevende dochter Maria nao ein verzorgingstehoes. Wie ’t hoes waerde laeggemaak waerde ’t arsjief van Frans terökgevonje. Pepiere ware aangevraete en neet meer te redde, mer waat euverbleef waas geweldig. Bienao doezjend sjetse en veursjtudies, plattegrunj, akkwarelle, ontwerpe in potlood en ink, besjtekke, foto’s, blauwdrökke, werkteikeninge veur sjteinhajers, glazeneers en sjrienewerkers.
Genog om ein gans meseum in te richte. Dörve veer os in Remunj neet los te make van name wie Cuypers, Stolzenberg, Oor, Thissen, Windhausen, Lennaerts, Houtermans, Germanus en Nicolas? Sjpeelt de poletieke karriejaere van Frans noe nog altied ein rol? Hae haet daodoor al noojts ein kirk moge ontwerpe. Waas hae meer arties es zakeman? Ongertösse is hae in ’t sjtadsbeeld van Remunj waal nog sjteeds promenent aanwezig en waere zeen panjer beuveurbeeld bie de tillevisie opnames altied in beeld gebrach.
Allang veur zoget wie de Oranzjerie in beeld kwaam had hae in 1930 al eine toneel- en konzaerzaal ontworpe op ’t Wilhelminaplein. Hadde veer det toen mer gedaon, dae had noe nog sjteeds neet missjtange. Dan waar os de elenj van de jaorelange poletieke diskussie en oeteindelikke besjlissing om ein tejater te boewe besjpaard gebleve.
De Bröksjtraot omduipe toet “Frens Depongsjtraot” is ein deil, mer ’t tweede deil zol motte zeen det d’r eine fetsuunlikke sjtraotnaam krieg.
