Zaoterdig 30 mei 2020. Emile Seipgens (10),  Gebaortehoes, Jesewietesjtraot 7

Foto: Guus Rüsing

Nao de Sjinderhannes beelde route (sjtökskes ein toet en mit nege) is ’t noe tied veur ’t gebaortehoes van Emile Seipgens. De route begos in de Bröksjtraot mit zien eige sjtandjbeeld, vervolges de heks, de ruivers, Sjinderhannes, de duvel. Florenske en es letste Zjwartse Peter op de Heilige Geissjtraot. Efkes truuk lik dan in de Jesewietesjtraot op nummer 7 ’t gebaortehoes van oze Emile. In de gevel is eine gedinksjtein aangebrach mit de teks: “De Remunjse sjriever Emile Seipgens waerde hiej gebaore op 16 augustus 1837. (Sjinderhannes 1868)”.

Emile Anton Hubert waerde dao gebaore es zoon van de beerbroewer Jan Hendrik Joseph Antoon Hubert Seipgens en Maria Theresia Hendrka van den Broek. Nao de legere sjool geit hae nao Rolduc op internaat. Nao veer jaor kump hae truuk en haolt op ’t Biesjoppelik Klezje zien gymnasiumdiploma. Hae volgt dan ein jaor ein sjtage op ein notariskantoor, mer det waerd nieks. Dan kump hae in 1856 in deens van de broewerie van zien vader. Op 16 augustus 1860 trouwt hae mit Anna Maria Berentzen. In 1874 geit hae Duits sjtedere in Göttingen, hae haet dan al veer kienjer. Nao ein jaor kump hae trök en haolt in Den Haag ’t Sjtaotseksame veur de MO-acte (Middelbaar Ongerwies) Duitse taal- en letterkunde. Dao op waerd hae leraar Duits in Tiel en dao nao in Zutphen. In 1883 is hae leraar in Leiden. Dao sjtörf hae op 25 junie 1896 en waerd op 29 juni begrave op de begraafplaats Groenesteeg, die eigelik Protestants is. Haet hae dao, omdet hae zoväöl gedoons haet gehad mit de Kattelieke kirk waegens zien tekste, dao bewus veur gekaoze? Zien graaf besjteit euverigens nog altied.

In Remunj zal hae waal ’t bekins blieve door ziene opera-bouffe Sjinderhannes. Dae is trouwens in 1864 gesjreve en neet, wie op de gedinkplaat sjeit, in 1868! De eerste oetveuring had ouch in 1864 motte zeen. “t Verhaol geit det Felix Routs, dae de duvel zol sjpele, per ongelök de sjof veur zien pekske verknip had om d’r kleijer veur zien kienjer van te make. Zodoende ware de eerste twee oetveuringe in Den Bos in 1865. Vertaald in ’t Hollands door, meugelik eine kollega van Seipgens, eine heer Somers dae ouch Sjinderhannes sjpeelde. De eerste twee opveuringe in Remunj ware op 26 en 29 desember 1865 door de Société Dramatique en t koor van de Sosjeteit Allegretto. Eine opera-bouffe is ein laat negenteende-eeuwse operette die veur ’t eers in Peries zo waerde opgeveurd in ’t tejater Des Bouffes, dao kump dae naam van.

Foto en teks: Guus Rüsing.

Aanmelden nieuwsbrief
Cookieinstellingen