Zaoterdig, 13 junie 2020. Remunj es frontsjtad.

Foto: Guus Rüsing
Eerder sjreef Eric Munnicks in de aanluip nao 75 jaor bevriejing veur Tante Bet 25 artikele. Dees zeen noe gebunjeld in tiedsjrifvorm. De artikele gaon euver de perejode van september 1944 toet de bevriejing van Remunj op 1 maart 1945. Boete dees perejode is d’r ein hoofsjtök euver Major General John B. Anderson, de bevriejer van Remunj en ein euver 1947 es de lieke van de 13 Remunjse jonges en van eine onbekinde Pool, die mit Kersmis 1944 zeen vermaord, waere truukgevonje en herbegrave.
 
Ongerwerpe die aan de orde komme zeen onger angere de munusietrein dae onger vuur waerd genaome bie Kitskensberg en wie de Pruusse zich in september 1944 teruuktrekke. D’r is väöl aandach veur ’t militair gebeure in en om de sjtad. Ouch de bombardemente op de sjtasie en de maasbrök komme aan de orde. Netuurlik ’t laeve in ein belegerde sjtad mit kienjer in de frontlien en Sinterklaos en Kersmis. Verder waerd ingegange op de evekwasie, mit es deeptepunt ’t gebeure rondjom ’t besjete van eine trein mit evekuees, es veurbeeld wie ’t ouch angere vergange haet. Bie alle artikele sjtaon interessante foto’s.
 
Dit waal unieke, einmaolige, tiedsjrif is oetsjloetend te koup biej De Kopieerder in de Deemselsjtraot. Geer kint keze tösse zjwart / wit veur 4,95 of kleur veur 7,50 Euro. ’t Biezunjer vrundjelik personeel maak uch ein werm kopie wo det geer bie sjtaot. Get veur kommende pappadaag?
 
Foto en teks:  Guus Rüsing.
X

Meld je nu aan voor onze nieuwsbrief
Aanmelden