Zaoterdig 29 junie 2020. Kepelderwaeg 15

Foto: Guus Rüsing
Jan Ales Jorna waerde op 20 julie 1854 gebaore in Wytgaard / Leeuwarderadeel es zoon van Abe Floris Jorna en Baukje Jans Houben. In desember 1888 kwaam hae, via Besel,  nao Remunj wo hae in de leer ging bie Pierre Cuypers. Dao nao begos hae veur eige kop es arsjetek. Hae woonde eers in de Sjoemaekerssjtraot en dao nao op de Nuje Boelvaar. In 1921 ging hae truuk nao Frieslandj, wo hae op 21 september 1927 sjtorf in Idaarderadeel, ongetrouwd.
 
Behalve ein resterasie van de Kepel in ’t Zandj teikende hae ’t noe aafgebraoke kammilliejaneklooster op de Aje Boelvaar, väöl woonhoezer in Remunj, ’t Klein Klezje en ’t bedriefsgeboe van van Hooff aan de Nuje Boelvaar. Boete Remunj is hae onger angere de arsjetek van ’t Raodhoes van Hors, de kepel van ’t Urselieneklooster in Eisde, ’t Sint Martinusklooster in Venlo, de Sint Katteriena en Lusiakirk in Lemjeers en ’t Sint Antoniuskrankehoes in Hors. Geine kleine jong dus.
Al aan ’t begin van zeen karriejaere (1888) ontworp hae ein woonhoes veur de Remunjse drökkersfemielie Romen. Opvallend zeen bie dit herehoes de keramiese versieringe rondj de vinsters en bie de gäötongersjteuners. De Jugendstil kondigt zich aan.
In dit geboe zoot ouch ’t Kantongerech en later ’t Arbeidsburo. Eine tied ouch ’t Nederlanjds Instituut veur Forensiese Psygiatrie en Psygologie.
Noe is ’t in gebroek van ein adfekaoteburo. Mit dinkelik de bekinste Remunjse vrouwelikke adfekaote, die raodsvrouw is veur ein van de bekinste Remunjenaere. Zie haet in ein intervjoew aangegaeve respek te höbbe veur ’t geboe en ’t histories interiejeur. ’n Aantal zakes die herinnere aan de tied det ’t geboe kantongerech waas. Zo zeen de aaj naamplaetjes van de “zittingszale” blieve hange en neet vervange door “vergaderzale”.
Letterlik: “Zo”n sjtaotig pandj ongersjrief det-se es adfekaot ouch ech örges veur sjteis. Es adfekaot of notaris geis-se neet örges achteraaf in ein fletje zitte. Waat ich d’r van weit is det ’t geboewd is in de sjtiel van ’t tradisionalisme en eklektisisme. Det letste mos ich trouwes waal efkes opzeuke”. (Sitaat oet Advocatenblad, geraodpleeg op 19 juni 2020 van https://www.advocatenblad.nl/2018/06/01/oude-grandeur-nieuwe-bewoners/).
Prima dus!
Foto en teks: Guus Rüsing.
X

Meld je nu aan voor onze nieuwsbrief
Aanmelden