Ludovicus Hendricus Pollaert waerde op 26 juli 1863 gebaore in Groot-Remunj. Det wilt zekke op ’t Gebrook in Neel, es Uul mot ich toegaeve det ’t dus eine Kater waas, avant la lettre! Neel blief Neel. Hae haet ein aantal sjoon panjer geboewd in Remunj, wo hae ouch ging wone. Dus telt hae mit es Remunjse arsjetek. Zien vader waas Martinus Hubertus Pollaert, metselaer, en zien moder Catharina Hubertina Kessels. Hae haet gewoond op Boetenop nummer 12 en vanaaf begin 1900 op de Zjwamaekerstjraot nummer 39. Det hoes haet hae in 1909 herboewd.
In desember 1900 duit hae ein aanvraog veur ein boevergunning veur ’t pandj aan de Nuje Boelvaar 75, op de hook van de Godsweerdersjtraot. ’t Woonhoes is dan ouch in 1901 geboewd.
In ’t arsjetektemiljeu van dae tied haet hae toch zien eige handjteikening. Det is te zeen bie anger ontwerpe van hem op de Nuje Boelvaar, ’t Wilhelminaplein en de Lindanussjtraot. Zien eige hoes op de Zjwamaekerstraot 39 is ein treffend veurbeeld.
Teks en foto: Guus Rüsing.
