Zaoterdig 17 oktober 2020. Jan Jorna (5) Nuje Boelvaar 20.

Foto: Stoffel M

Jan Ales Jorna waerde op 20 julie 1854 gebaore in Wytgaard / Leeuwarderadeel es zoon van Abe Floris Jorna en Baukje Jans Houben. In desember 1888 kwaam hae, via Besel, nao Remunj wo hae in de leer ging bie Pierre Cuypers. Dao nao begos hae veur eige kop es arsjetek. Hae woonde eers in de Sjoemaekerssjtraot en dao nao op de Nuje Boelvaar. In 1921 ging hae truuk nao Frieslandj, wo hae op 21 september 1927 sjtorf in Idaarderadeel, ongetrouwd.

Op 31 jannewarie 1891 is de aanbesjtaejing van Nuje Boelvaar 20, ’t boewe van ein herehoes veur de raekening van Goossens, veearts in Remunj.’t Pandj sjteit aan de rechse kantj vrie. De frontgevel haet ein gepleisterde plint en gepleisterde sjpeklaoge.Aevezo de aanzitte en sjloetsjtein van de vinsters en deur. Segmentbaogvormige vinsters en deur mit baoveleechter van glaas-in-lood en baove de veurdeur fraai siersjmeedwerk..De vulsjtökker van de vinsters höbbe siermetselwerk en fraai sjtuukwerk in ’t vulsjtök van de deur. Veer lisene, wovan twee de inganksparie aksentuere, mit gesjtuukde diamantköp. Die grbroekde Jorna waal dökker. Onger de daakrandj siermetselwerk. AaN de rechterziegevel eine oetbouw van ein boewlaog mit dao op eine balkoen mit ein sjmeediezere hek.

Teks: Guus Rüsing.
Foto’s: Stoffel.M