Ludovicus Hendricus Pollaert waerde op 26 juli 1863 gebaore in Groot-Remunj. Det wilt zekke op ’t Gebrook in Neel. Hae haet ein aantal sjoon panjer geboewd in Remunj, wo hae ouch ging wone. Zien vader waas Martinus Hubertus Pollaert, metselaer, en zien moder Catharina Hubertina Kessels. Hae haet gewoond op Boetenop nummer 12 en vanaaf begin 1900 op de Zjwamaekerstjraot nummer 39. Det hoes haet hae veur zichzelf geboewd. Hiej woonde hae toet hae in 1945 sjtorf.
Op 24 april 1908 kump de boewvergunning veur de herboew van ein weuning veur oze arsjetek. Me kint zich aafvraoge waat presies is herboewd en waat is blieve sjtaon. In elk geval is de veurgevel dudeklik oet dae tied. Veer zeen ein breij plintj en horizontaal gepleisterde benj. D ‘r is riek gebroek gemaak van versjillende kleure baksjtei.
Rondj de vinsters, baove de deur en tosse de twee boewlage greun geglazuurrde sjtein; ein knipuigske nao de Jugendsjtiel. Rieke versieringe onger de daakrandj. Twee daakkepelle mit eine gedörfde, kesjteelechtige opboe en aopegewerke arkadwebäögskes. Dao tösse ein forse ballustrade van sjmeediezer. Al mit al ein sjoon fesitekaertje van eine Neelder jong dae in Remunj geit wone es arsjetek,
Teks: Guus Rüsing.
Foto’s: Arend Masius.
