DinsdIg 3 november 2020. Frans Rouleau (4). Aje Boelvaar, nommers 62 toet en mit 70.

Foto: Arend Masius

Franciscus Hubert Joseph Rouleau waerde op 5 oktober 1852 gebaore in de Munsterssjtaot en hae sjtorf op 7 jannewarie 1914, ouch in Remunj. Zien elders ware Franciscus Josephus Rouleau, tummerman (1826-1910) en Anna Catherina Reulen (1823-1892). Hae lik begrave, mit zien eerste vrouw, zien elders en twee zösters op D’n Aje Kirkhaof, (Vak A, 513-516). In 1871 vertrek hae nao Antwerpe om te sjtudere aan de Akkedemie. In 1876 waas hae getrouwd mit Anna Hubertina Janssens die al in 1884 sjtörf. Hae hertrouwt in 1886 mit Theresia Maria Helena Berger. Tösse 1892 en 1896 wone ze in Antwerpe. In 1885 boewt hae veur zichzelf en zien gezin ein groot hoes mit wirkplaats aan de Neersjtraot 40. Dit waas lange tied kantoor van de PLEM, noe ein nagelsjtudio.

Veur ’t boewe van vief herehoezer op de Aje Boelvaar. de nommers 62 toet en mit 70, precies op de dreij waerd in 1883 en 1884 vergunning gevraog. Det kint de raeje zeen van de aafwieking van de konsaole onger de daaklies van nommer 42, ’t meis rechse van dit rieke van vief. De plinte zeen euveral ’t zelfde, pront wie de raampartieje mit dörpels van Naamse sjtein en de drie boelaoge. De hoesnumering op de Aje boelvaar geit van rechs nao links, dus Helmans/Lichtelijn is hoesnommer 70 en ’t viefde panj.
Jaomer is hie weer det de hoeseigenaere zich neet ongerein kinne versjtaon om de eigenheid van dit kompleks in sjtand te haje. Pront wie det mit de zes hoezer van Rouleau aan de euverkantj is gebeurd. Det waas ein sjoon geheel gewaes en ein eerbewies aan eine Remunjse arsjetek dae beeldbepaolend haet geboewd. Neet allein op de Boelvaar maar ouch op ’t Sjtasieplein en de Vinlosewaeg.

Tekst: Guus Rüsing.
Foto’s: Arend Masius.