Vriedig 23 oktober 2020. Jan Jorna (6). Op d’n Oever 1 / Achter de Kirk 27.

Foto: Stoffel.M

Jan Ales Jorna waerde op 20 julie 1854 gebaore in Wytgaard / Leeuwarderadeel es zoon van Abe Floris Jorna en Baukje Jans Houben. In desember 1888 kwaam hae, via Besel, nao Remunj wo hae in de leer ging bie Pierre Cuypers. Dao nao begos hae veur eige kop es arsjetek. Hae woonde eers in de Sjoemaekerssjtraot en dao nao op de Nuje Boelvaar. In 1921 ging hae truuk nao Frieslandj, wo hae op 21 september 1927 sjtorf in Idaarderadeel, ongetrouwd.

De omgaeving van de Rattetore toet veurbie de Sint Janssjtraot waerde “Op d’n Oever” geneump. Vreuger sjtruimde hie eine zietak van de Maas, de Sint Jansmaas. Dae naam kump al in 1397 veur. Wanneer ’t de Pesjtoorswal is gaon heite is onbekind. “Achter de Kirk” hoot eers Kirksjtraot en waerde later “Grotekirksjtraot” (ein waord!).

 

De aanvraog boevergunning is van 11 julie 1890 en sjprik van vergunning veur twee woonhoezer op de Pesjtoorswal, hook Kirksjtraot. Dus toen waas “Grotekirksjtraot” nog neet van doon. De opdrachgaever is ’t kirkebesjtuur van Sint Krissjtoffel. De aanbesjtaejing sjteit pas op 26 jannewarie 1893 in de Maas & Roerbode.

 

Dit hookpandj haet dörpels van Naamse sjtein. Baove de vinsters en deure ein rondjbaogvormige omliesting in lichroje baksjtein. De vulsjtökker aafwisselend in keper- en blokverbandj, tiepies sjool van Cuypers. De aafgesjuunde hook löp oet in eine trapgevel, de trepkes zeen gedek mit Naamse sjtein. In dae toep ein kleiner vinster in de sjtiel van de res van de rame. Verder in dit geveldeil in de eerste en tweede boelaog ein blinj nis. De nis in de eerste boelaog haet ein kepelkes-echtige invulling wo-in ein Mariabeeld sjteit. Onger de daakrandj sjoon dekoratief metselwerk in lichroje baksjtein. De sjtiel is tradionalisties, Cuyperiaans-klerikaa, ’t ware dan ouch weuninge veur de keplaons mit häör maag. Jaomer det de ingangsdeur aan de Grotekirksjtraot verkl..t is.

Tekst: Guus Rüsing.
Foto’s: Stoffel.M.