Rommel is geine rotzooi: det kint geer zelf ervare op zaoterdig 5 september in Neel. Op teentalle plaetskes in Neel kint g’r es verkuiper of kuiper van partekelere sjpulle eure sjlaag sjlaon.
WijZijnMaasniel organizeert dae daag van 10 toet 15 oer de eerste Neelder Rommelroute. Gein rommelmert mit allemaol kräömpkes biejein, mer teentalle verkoupsjtends in de häöfkes of op opritte van deilnummende inwoners versjpreid door gans Neel. Ein nuuj corona-proof dörpsactiviteit wo idderein gratis aan mit kint doon. D’r zeen ’n paar sjpelregels: de verkoup moog allein “op eige grondj” plaatsvinje, en dus neet oppe aopebare sjtoep of waeg; en verkuipers motte zich van te veure aanmelje bie de organizasie. Det kint via ’t formelier op www.wijzijnmaasniel.nl. Doot det veur 28 augustus, dan krieg g’r veuraaf ’n promosiepakketje veur eure verkoupsjtend.
Organizator WijZijnMaasniel is dae daag aanwezig mit ’n infotent op ’t Betjesplein, en haet dan veur alle geïnteresseerde ‘ne plattegrondj mit alle verkoupadresse van de Neelder Rommelroute besjikbaar.
Sjrief deze datum mit ’n dieke sjtif oppe kalender, en ruum alvas eure zölder, kelder en graasj op. Al die döbbele, ongebroekde sjpulle kint g’r prima kwiet tiedes de verkoup veur eige deur.
Doot mit en sjpraek ’t rondj!
’t Waerd ‘ne gezellige en verrassende kuipkesdaag!
WijZijnMaasniel zal uch verder op de heugte haje via häör website, de Facebookpagina en de Neel-Mail nuutsbreef.
