Sjtraotvaeger 2020/11: Veer valle neet óm?

Van oet miene sjoelkelder volg ich ut nuujts op de voot. Ich naem de advieze van de Minister President en tal van viruloge op. In häör kielzog tal van burgemeisters die neet achter kinne blieve.

Angerhalve maeter blief ich van ederein aaf. Ich zeuk de luwte op waat neet moeilik is. Mien enige ketak mit de boetewaereld is via miene i-pad en de einzame wanjelaer dae ich zeen as ich de hóndj oetlaot. Aan väöl reacties merk ich det der angs is ónger de luuj. Hoe geit dit verder? Verpleeghoeze zeen al veur bezeukers gesjlaote en doe kins diene dierbare dao neet bezeuke.

Dao vinje al debatte plaats woh in de vraog waert gesjteld waem in eine piektied ut eerste waert geholpe. Ich höb väöl gelaeze en mót good kieke waem deskundig is en waem ondeskundig. Dao is meer fake nuujts dan ooit van te veure. Kwartjesjoernaliste meine ouch ein biejdrage te levere en jage de luuj nog meer de sjtuupe op ut lief dan neudig is.

Ouch de onversjillige burger dae groepsgewies zich tref en de regelgaeving neet naolaef móste ze ein halt toerope. Ut is crisis en dao mótte veer same mit klaor kómme. As ederein zien eige keuninkriek maak geit ut fout. De tied zal lere waem geliek haet gehad. Of det China éch gein sjlachoffers biej krieg en of Kim Jong-nog gét, baeter veur zien volk had mótte zórge in plaats van mit doon aan de waopewedloup. Dae crisis is nog neet veurbiej en de eine regel volg de angere op.

Ich heur biej de kwetsbare oudere en moog sjmórges tösse 7.00 en 8.00 oer boodsjappe doon. Maar as ich nao de tillevizie kiek en zeen de jeug in grote groepe sjpele dan vraog ich aaf waat ut allemaol veur zin haet. Handjhaving is ouch in deze tied weer ein waord det veer in Nederlandj neet kinne as ut op oetveuring aan kump.

As ich mit de hóndj wanjel in de omligkende bosse zeen ich det de létse tied de buim massaal zeen ómgekiep. Neet allein aaj maar ouch jóng buim loge ut leudje. Is ein bietje troosteloze omgaeving pas ein bietje biej de tied woh veer in laeve.

As veer ós aan de regels haaie höbbe veer de meiste kans det veer neet omvalle. Sjteun uch óngerein en bel ins gét ekstra nao diej miense diej nemes moge of kinne ontvange.

Sjterkte allemaol en blief gezóndj.

Toet vaegs, Uche Sjtraotvaeger Dré.