Zaoterdig, 15 oktober 2022.
De koperasie aan de Hendriklaan waas bekind in Europa en de rest van ’t Veldj. ’t Pandj sjteit d’r, nao jaore van verwaarlozing, gelökkig weer good op. ’t Waerde geboed in 1919 es winkelpandj mit baoveweuning. De arsjetek waas Joseph Cuypers, jao, de zoon van Pierre. ’t Sjilddaak heurt waal ech bie hem. Bezönjer is ’t tegeltablo mit ’t logo van de CO-OP. Hiej waerde toendertied, wie det hoot, ouch koloniale ware verkoch.
’t Bedrief de CO-OP begos in 1891 als koperasie in Zaandam. Dao kwame febrieksarbeiders in opsjtandj taege de leeg lone, hoog prieze en de sjlechte kwaliteit van de laevesmiddele. Ze begoste same winkelkes. Hiej verkochte ze de waar taege redelikke prieze aan de leje: de koperasie.
Mesjien is dit konsept in 2022 weer akteëler es ooit.
Teks en foto: Guus Rüsing.
