Sjtraotvaeger 2020/8: Gaeve en naeme!

Foto: Dré

Waat ein hypocriet geneuzel vriejdaag in de gezet. De twee wethaaiers Smitsmans en Waajen gluive det ze mit de Passion en Biënnale miense mit elkaar kinne verbinje.

Ut kós ein vermoge en det mót weer waere opgebrach door bezuuniginge. Dao zeen meer Remunjenaere die nieks höbbe mit Biënnale of Passion dan luuj diej der waal gét mit höbbe. Duit mich dinke aan diej luuj diej eine Mercedes veur de deur höbbe sjtaon en häör kienjer neet voldoende te aete kinne gaeve. Of de patsers die in de duurste kleijer róndjloupe en neet ins de huur van häör hoes kinne betale. Zo kin ich nog waal aeve doorgaon. Waat ein arrogantie in det sjtadhoes woh ze aan hoogvleegerie doon.

Help noew eers de luuj diej hulpbehoevend zeen. Dao ligk uch taak en neet in ut sjoon waer sjpele. De burgers vinje de Passion en Biënnale waal leuk maar as ze wete det dit ein paar tientjes per bewoner kós zulle der hil väöl zégke ‘Laot maar!’. Daonaeve zeen der ouch nog diverse claims te verwachte van óngernaemers die al sjnel in de miljoene gaon loupe.

Toen Jos van Rey in de létse raodsvergadering kont deej van ut feit det Remunj artikel 12 zou waere mit al diej te verwachte claims lag de burgemeister hem ut zjwiege op. De waorheid is bitter en moog in Remunj neet gezag waere. Zou nao de Passion en Biënnale de Remunjse middesjtandj meer in ut laedje kriege of is ut allein weggelag veur de horeca en hotels? Waem wit beveurbeeld in welke plaatste de létse jaore de Passion is georganiseerd en waat ut gekós haet en opgebrach haet?

Maar ondanks de kritische geluiden zal ein en anger geweun doorgaon en moge veer later op de blaore zitte. Ut sjtadsbesjtuur wilt ós gét gaeve maar zal daoveur ouch väöl naeme. Ich maak der noew al ein groot kruujts achter.

 

Toet vaegs.

Dré.

Uche Sjtraotvaeger

Reacties