Hubertus Wilhelmus Smeets waerde op 3 desember 1861 geboare in Melick en sjtörf op 7 junie 1940 in Remunj. Op 9 mei 1884 trouwt hae in Neel mit Cornelia Verhaegh (1856 – 1921). Ze gaon wone aan de Kepel en kriege 14 kienjer wovan ein aantal vreug sjtörf. Aanvankelik is hae van professie rajemaeker. Tösse 1860 en 1890 is hae sjrienewerker en aannaemer. Hae haet väöl hoezer geboewd aan de Kepel. Hae werkde onger de firmanaam Smeets-Verhaegh. ’t Echpaar lik begrave op D’n Aje Kirkhaof, Vak 6, nommers 132-133).
Op 12 september 1902 waerd ein boewvwergunning aangevraog veur ’t boeve van vief woonhoezer op de Krankewal. De Nommers 6, 8, 8A, 10 en 10A. De Boewsjtiel van allemaol is tradisionalisties. Euver de nommers 6, 8, 8A en 10 väölt te vertelle det ze ein gepleisterde plint höbbe en gepleisterde sjpeklaoge. In de raam- en deuromliestinge zeen aafgerondjde lich rooj baksjtein gebroek. De konzole onger de gäötrandj zeen riek gesjtuuk. Siermetselwerk mit konzäölkes in segmentbäög baove de vinsters en deure.
Nommer 10A wiek veural aaf door minder sjpeklaoge en ein rechheukige deur en raamomliesting. ’t Sjtuukwerk onger de daakgäöt is ’t zelfde es bie de anger penj.
Teks en foto’s: Guus Rüsing
