De Sjtraotvaeger 2021/1 Waat fout is kins ze neet réch kalle!

Foto:

Ut is toch van de dolle det eine burgemeister de raod leut wete det ze zich baeter neet mit individuele zake mótte bezig haaie. 

 

Aanleiding is de sjloeting van Welkoop in Neel. In heel Nederland zeen 150 Welkoop zake geweun aope en allein in Remunj en Éch neet. Volges burgemeister Donders höbbe alle anger burgemeisters in Nederland ut fout en haet zie ut geliek aan häöre kantj. Det höbbe veer al dökker mitgemaak det mooder-overste meinde det ze geliek had en achteraaf ongeliek kreeg. Maar dan guf ze neet meer thoes.

Ut zjwiege euver anger missjténj in Remunj is auch ein trekske van ózze eerste burger. Ut anges ophaole van ut hoesvoel is biej hil väöl börgers sjléch gevalle om maar te zjwiege euver de perkeerheffinge die der aan sjtaon te kómme in de noew nog blauwe zones. Om maar neet te kalle euver ut coffeeshopbeleid. De volksvertegenwoordigers moge missjténj neet aankaarte en det waert door de wegkiekende meerderheid van de raod auch good opgevolg. Mit promosiefilmpkes op eine lokale zender prebeert de eerste burger van Remunj ein charmeoffensief in te zitte. Waem betaald dit eigelik en waem betaald de extra promosie op fb? Leeje van ut sjtadsbesjtuur gebroeke auch de OM krant om aan zelfverheerlijking te doon. Dao woh tante Bet achter blief waert de promosie ingekóch. 

 

De kritische burger prik dao doorhaer. Missjténj in de sociale sector wille ze in ut sjtadhoes neet heure, burgers waere neet geheurd, vraoge van raodsleeje waere neet beanjwaord en de burgemeister haet allein maar oug veur wiej ze ut kollege mót verdedige. 

Häör rol as veurzitter van de raod waert neet correc ingevuld en de Remunjse burgers die zich biej häör mélje waere meistal mit de neudige hoogmoed aafgeserveerd. Nog 14 maondj en dan moog de Remunjse bevolking häör oordeil gaeve euver dit complete  sjtadsbesjtuur.

Dao heers onrös in ut sjtadhoes aan de Mért. De landelikke pertieje diej noew ut kollege vorme ligke in de peilinge op groot verlees. Ut Klavereffect is oetgewirk, D66 haet de trein gemis en zit in ut tweede peloton en ut CDA haet de windj auch taege. Mit de kóms van nuuj pertieje en de oplaeving van de PvdA kóste de verkeezinge in maart 2022 waal ins anges oetpakke as dat ze in de huidige coalitie gaer wille. De burgemeister kós waal ins mit ein gans anger kollege te doon kriege as noew. Dao wringk de sjoon en daorom waert de oppositie in de raod door de burgemeister ut zjwiege aangezag. Maar gelökkig zeen der in Remunj nog pertieje diej ut belang van de burger verdedige en missjténj blieve aankaarte. 

De verkeezinge 2022 zulle oetmake of de luuj zich nog langer laote ringelore. 

Burgers blief missjténj mélje dan blief ich ze aan de kaak sjtélle.

Toet vaegs, 

De sjtraotvaeger. 

Aanmelden nieuwsbrief
Cookieinstellingen