Zaoterdig, 8 oktober 2022.
In 1307 kwaam d’r ein klooster van de Minderbroeders oftewaal Fransiskane, ouch de Serafijnse orde geneump in Remunj. In ’t Letiens Ordo Fratum Minorum, aafgekort: O.F.M. Det is zoget 100 jaor nao de sjtichting van die orde door Franciscus van Assisi. ’t Is ein baedelorde en ’t motto is: Pax et bonum, Vreje en alle goods.
De kloosterkirk die veer noe zeen sjtamt oet de 15de eeuw. In 1572 waerde ’t klooster en de kirk geplunjerd door de troepe van Wullem de Zjwieger, laot ‘m mer zjwiege, de Vader des Vaderlands. In 1796 waerde de Broeders weggejaag door de Franse en zeen nooijts meer terökgekomme. De kirk waerde gekonfiskeerd door de Franse, die maakte d’r eine paerssjtal van, mit inbegrip van ein sjtreuj en huimagezien.
In 1820 kwaam ein gedeilte van de kirk in eigendom van de Hervormde Gemeinte van de garnizoenssjtad Remunj, in 1864 ’t ganse geboe. Ongertösse ware de kloostergeboewe in1863 al aafgebraoke. Zo onsjtong de Peregrinus Vogelssjtraot, väöl Remunjenaere is dae naam te lestig en dan waerd ’t de Pieter Vogel-sjtraot.
Peregrinus Vogels waas door Philips IV, keuning van Sjpaanje, toet bisjop van Remunj beneump en die beneuming waas al goodgekeurd door Rome. Jaomergenog sjtorf hae zonger gewiejd te zeen op 4 oktober 1649. Hae lik begrave in de Kattedraal en de graafsjtein is d’r nog altied.
Oze Pierre Cuypers haet de kirk beheurlik gerestereerd. D’r zeen zelfs noch elemente terök te zeen van de aaj sjtadsomwalling wo de kirk vlak taegenaanloog aan de Krankewal. De kirk had zjwaor te lieje van de aardbeving mer is sjitterend gerestereerd. Gaot ins van binne kieke!
Teks en foto’s: Guus Rüsing.
