Zaoterdig, 19 november 2022.
De sjteine brök, ouch bekind es Maria Theresiabrök, is de verbinjing tösse de Faubourg Saint Jaques en de sjtad. Al in ’t begin van de veerteende eeuw loog hie ein houtere brök veur ’t verkeer nao ’t zuje en weste. Det ging dan nao ’t weste via ’t vaer euver de Maas in Ool. Veer kinne noe nog de oetdrökking “Dae is nog neet in Ool euver”.
Waarsjienlik in de zesteende eeuw waerde de houtere brök vervange door ein van sjtein. In de nujaorsnach van 1764 waerde dees weggesjpeuld door ’t hoog water en ies in de Roer. Op 17 juni 1771 loog burgemeister Sijben de eerste sjtein veur de nuuj brök oet Naamse sjtein, geboewd op de pielers van de aaj brök. Aan de sjtrouwkantj van de Roer waerde oetsjtaekende iesbraekers aangebrach, men had geleerd. De middelste baoge zeen vrie hoog om nog get vesserssjeepkes te kinne doorlaote, daodoor is de brök vrie sjtiel.
In 1771 waas keizerin Maria Theresia van Oosteriek de bazin van Remunj en bie häör waerde “patent” aangevraog om de brök te moge herboewe. Vandao det de brök ouch häöre naam dreug. Remunj betaalde zelf de de köste door ein verhoging van de aksiens op ’t beer. ’t Verhaol det de keizerin de brök haet betaald klop dus neet.
In 1944 waerde de brök weer verwoes, noe door oorlogsgeweld. In 1954 waas zie gerestereerd. Dao herinnerd eine gedinksjtein aan, midde op de brök, in ’t letiens. Vertaald: “onger de gooj regering van Juliana, keunegin van Holland”. Det “Holland” zal toch waal ein vergaet zeen gewaes?
Teks: Guus Rüsing.
