Maondig, 15 junie 2020. Neersjtraot 7

Foto: Guus Rüsing
In jannewarie 1907 waerde de boevergunning aangevraog veur dit pandj op de Neerstjraot nummer 7. De Sjoester H. Laumen wilde hie ’t aad hoes aafbraeke en ein nuuj boewe. ’t lik markant op de hook van ’t pleintje veur Hotel Lion d’Or, noe de bieb. Aan de achterkantj lik ’t Sjietbergske. Eigelik haet ’t pandj ein saort V-vorm mit etalages rondjom. Helemaol rechs zoot eine raam dae noe half is toegemetseld. Ewig zunj is det de erker op de eerste verdeping is weggehaold en vervange door eine balkoen. Oorsjpronkelik ware d’r veer verdepinge aan de rechse kantj, mit eine tössezölder en links dao van eine toepgevel. Good zeen de segmentbaog van de tweede en derde verdeping te herkinne. ’t Gebroek van (greun-) gekleurde baksjtein, hiej in de vinsterbäög en es sjpeklaog in de gevel, is tipies veur de Jugendstil. Jaorelank haet hie eine melk- en keeswinkel van Zaeyen in gezaete.
 
De arsjetek waas Guillaume Marie Hubert Langenhoff. Hae waerde op 15 juni 1879 vlakbie gebaore op ’t Bergske. Zien vader hoot Nicolaas en waas bekker. Zien moder hoot Elise Straatman. In 1900 geit hae nao Oegstgeest. In 1903 kump hae, via Amsterdam, (haet d’r dao ein opleiding gevolg?) truuk nao Remunj. Hae leet zich dan insjrieve es boekundig teikenaer. In 1903 geit hae veur ein jaor nao Vlissinge. Dan vertrek hae in 1911 weer nao Amsterdam, wo hae mit ”t Remunjse maedje Francisca Tevonderen trouwt. In 1959 sjtörf hae.
In Remunj zeen wiejer ’t hoes op de Krankewal 11-13 (oet 1905) en ein verboewing van Neersjtraot 64 (1907), de aje Floorshop, van zien handj.
Teks en foto: Guus Rüsing.
X

Meld je nu aan voor onze nieuwsbrief
Aanmelden