Dr. Peter Josephus Hubertus Cuypers waerde in 1827 op de Hamsjtraot gebaore es negende kiendj van Joannes Hubertus Cuypers (1769 – 1858) en Maria Bex (1781 – 1874). In 1921 sjtörf hae in Remunj. Op angers plaatse is väöl euver hem gesjreve, dus hie allein dees korte tekst euver hem.
Willem Hubert Slenders waerde in 1852 in Remunj gebaore es jongste van ach kienjer van de oet Bujel kommende Wilhelmus Slenders (1807 – 1875) en Petronella Kneepkens (1810 – 1896). In 1884 trouwde hae mit Maria Francisca Hubertina Janssens van de Sjuiteberg 17. In 1933 sjtorf hae, sevetig jaor aad, en waerde begrave op D’n Aje Kirkhaof, RK – gedeilte, Vak 1a, nummer 19. Det graaf is d ‘r nog en waerde es eerste “om niet” door de Gemeinte omgezat van huurgraaf nao koupgraaf veur onbepaolde tied. In 2007 waerde ’t gerestereerd.
Wullem Slenders waas van prefessie goldjborduurder in ’t atteljee van Pierre Cuypers. In 1909 goof hae de opdrach ein hoes te boewe op de Krankewal 7 / hook Peregrinus Vogelsjtraot. De arsjetek waas ziene baas, Dr. P.J.H. Cuypers. In detzelfde jaor begos ’t echpaar Slenders-Janssens op dees plaats ein kefee-biljaar. Hae bleef tegeliekertied werke es goldjborduurder. Hae kreeg drie dochters: Gertrudis, Cécilia en Elisabeth en eine zoon: Frens.
Deze zoon, Franciscus Hubertus Slenders (1892 – 1972), trouwde in 1918 mit Anna Maria Hubertna Deklerk (1890 – 1979). Frens waas oorsjpronkelik muibelmaeker van beroep. Vervolges begos hae mit zien vrouw in 1921 eine book- en pepierwinkel aan Achter Kloosterwandj nummer 2. De zaak waerde wiejer geveurd door häör zeuns. Noe zitte häör kleinzeuns in de ketoorvakhanjel “veur alles waat sjrief”, nog altied op hetzelfde adres.
“t Pandj is ein tradisioneel Cuypers pandj mit de hook sjuuns aafgemaak. D’r zeen versjillende kleure baksjtein gebroek in horizontaal benj en in de rollaoge van de rondjbaoge van de vinsters. ’t Trapgevelke (waat hoogneudig gevoog mot waere!) is interessant: ’t Is bekroond mit ein aopesjtaonde sjelp en frontaal is d’r ein saort waopesjild te zeen mit ein zon, get onlaesbaars en ’t jaortal 1908, waat neet klop mit de vergunningaanvraog, die is van 1909.
Mit dank aan Frank Slenders en John Vaessen.
Foto en Teks: Guus Rüsing.
