Drie jaor geleje, op 28 april 2017, sjtorf de Remunjse kunstenaer Adolf (Dolf) Egbert Adriaan Marie Wong Lun Hing mit 95 jaor.
Zoon van de hoesarts Wong Lun Hing, van Sjinees-Surinaamse kom aaf, en ’t Remunjse maedje Franssen, ein dochter van de arsjetek Casper Franssen.
Hae sjudeerde aan de Rieksakkedemie veur Beeldende Kunste bie prefesser Jan Bronner. De veurnaamste teemaas van zien werk zeen de miens, de beestewaereld en de jach.
Ein van zien sjoonste beelde, technies zeer gedörf, is ’t beeld “Maedje mit de meeuwe” det noe op de Rotonde Krankewal / Roerkade / De Sjter sjteit. ’t Is gemaak van brons en Cortensjtaol en sjteit op eine zjwerfkei. Nao ziene dood ginge d’r sjtumme op om dees rotonde de “Dolf Wong Rotonde” te neume. (Ich zol dao ouch nog altied veur zeen).
Bie ’t beeldje heurt ein plakette mit de teks:
Ter herinnering aan de
plechtige ingebruikstelling van de
willem-alexander haven
onthuld door
Hunne Koninklijke Hoogheden
Prinses Beatrix en Prins Claus
der Nederlanden
op 16 juni 1967
’t Kunswerk waas eers geplaats bie dae Wullen-Aleksander have en kwaam later op deees rotonde terech. De onthulling van ’t beeldje destieds waas de eerste offisjeel openbaar plechtigheid van Prinses Beatrix en Prins Claus nao de gebaorte van Wullem-Aleksander op 27 april 1967.
Op ein gegaeve moment zeen d’r bronze meeuwe gesjtaole. Gelökkig kos Dolf, aan de hanjd van foto’s en teikeninge, zelf nog de resterasie doon. Op 30 juni 2013 waerde ’t weer kompleet teruukgeplaats onger ’t oug van de meister zellef. Allewieles is ’t dinkelik ’t zjwaors bewaakde beeld van Remunj, en terech.
De insperasie veur ’t beeld kreeg Dolf, zo vertelde hae mich ooit zellef, kreeg hae wie hae vanoet zien vinster toes keek nao ein naefke of nichje waat boete, in de haof, duufkes aan ’t vore waas. Det waerde ’t beeldje veur de kleutersjool in Vlorop. Wie hae van de Gemeinte Remunj de opdrach kreeg veur ein groter beeld, aan ’t water van de nuje have, kreeg hae dit idee. Meeuwe wone aan ’t water van de Maas. Ein maedje prebeert, veur ’t geweld van de hongerige meeuwe half geboek, half op de huukskes, sjtökskes brood eerlik te verdeile.
Teks en foto: Guus Rüsing.
