Zunjig 28 julie 2020. Frans Dupont (5). Waat hae neet boede.

Foto: Arend Masius
Ein van de interessantste geboewe die Frans Dupont neet haet kinne boewe in Remunj is waal ziene teneel- en konzaerzaal. ’t Sjudie-ontwerp is oet 1930. De plaats wo hae ’t zich gedach had waas ’t Wilhelminaplein, vlak bie zien woonhoes. Remunj had dao, es tweede kultuursjtad van Limburg nao Mesjtreech, behoefte aan. De tejatertent van Piet Vink, eine keer per jaor mit de kirmes, waas ech neet genog. De Hermenieshaof waas te klein, pront wie get kefeezaelkes of de sosjeteite.
 
Waat Frans Dupont ontworp waas neet minder es geïnspireerd op ’t Konzaergeboe in Amsterdam en de Opera in Luuk. Doe mos maar dörve! Ein richtig sjtadstejater. Eigelik de enigste ongersjteuning kreeg Frans van burgemeister Steinweg. Dae waas jaomergenog al nao twee jaor weg nao Nijmege. Toen waas ’t raddikaal aafgeloupe mit de planne. Frans loog poletiek neet good omdet hae raodslid waas veur de “Roermondsche Onafhankelijke Kiesvereniging”. Die waas links-liberaal en det waas neet good in ’t Remunj van dae tied, nog erger waas det die partie neet katteliek waas. Det is geliek de raeje det Frans nooijts ein kirk of klooster haet moge ontwerpe.
Waat zol Jo Adams zaliger greuts zeen gewaes es hae zien Civitas program in dit geboe had moge orgenesere in plaats van in ’t Royal Tejater. De Oranjerie waas dan ouch nooijts geboewd. Al eerder sjreef ich det Frans Dupont, es grote Remunjse arsjetek, eine sjtraotnaam verdeend. Is ’t ein idee ’t Wilhelminaplein nao hem te verneume?
Teks: Guus Rüsing.
Foto: Arend Masius. (Illustrasie oet: Tummers, Piet: Architect Frans Dupont drukte stempel op Roermond. In: Spiegel van Roermond, Jaarboek voor Roermond. Een uitgave van de stichting Rura. Roermond, 1995. ISBN 90-74602-03-7.
Door Covid-19 waas ’t neet meugelik ein foto van de orizjeneel teikening te make.
Aanmelden nieuwsbrief
Cookieinstellingen