Vriedig 24 julie 2020 Sjtuf

In Remunj waerd vandaag 't Hoogfees van Sinte Krissjtoffel gevierd. De Letiense naam Christoforus beteikent "Kristes-drager". Ziene naamsdaag veel toet 't Tweede Vatikaans Konsilie op de 25ste julie. Omdet det ouch de naamsdaag van de apostel Jacobus is waerde det eine daag verplaats. In 1969 waerde hae door 't Vatikaan van de offiesjele Heiligekelender aafgeveurd en moog allein nog plaatselik vereerd waere. Wie in Remunj dus. Interessant is det in 't Kalendarium van de Munstersabdie ouch de 25 julie es feesdaag geneump waerd en in 't biesdom Kölle de 26ste. Det waas wiet veur det 't eerste biesdom Remunj ontsjting.

In de Ortedokse kirk is hae ouch bekind, ziene feesdaag is dao de negende mei. Hae waerd dao döks aafgebeeld es reus mit eine hondjskop.

Sjtuf is de petroonheilige van de reizigers, van ederein dae in 't verkeer zit, tummerluuj, sjilders, pelgrims, fruithanjelaere, bookbinjers, sjatgravers, haokebussjötters, heujmaekers, haofluuj en kienjer. Es noodhelper kint hae aangerope waere bie besjmettelikke ziektes (Covid-19?), eine onverwachde dood, de pes, dreugte, onwaer, hagel, watersnood, vuur, ougkranktes en tandjpien. Eine alleskinner dus.

Es petroon van de onverwachde dood sjteit zien beeld döks aan de in- en oetgank van de kirk. 't Middeleeuwse volksgeluif meinde namelik det, es-se op eine daag ein beeld van Krissjtoffel hads gezeen, det-se dae daag neet zols sjterve. Op zo'n plaats mos-se zien beeld waal zeen.

Remunj zol Remunj neet zeen es veer det neet groots zolle aanpakke. Hae sjteit sjtols

baove op de moderkirk en ederein kint 'm dao al daag zeen. Dus nemes hoof te sjterve. Daomit höbbe veer waal de insigste Krissjtoffelkattedraal in de werreld!

Foto's: Arend Masius

Tekst: Guus Rüsing