De genade van onzen Heeren Jesus Christus zij met u allen. Amen.

Foto: Guus Rüsing

Dit sjteit baove de ingangsdeur van waat in Remunj de Protestante kirk waerd geneump en sjtamt oet de Openbaring, XII, vers 21.

De gesjiedenis van dees kirk get terök toet ’t jaor 1307, dan rich Graaf Reinould I van Gelder ein Minderbroedersklooster op. Rondj 1400 zol dan pas de eerste kirk zeen geboewd, flak biej de sjtadsmoer. Dees kirk waerde rondj 1500 vergroot en ’t goties koor en ’t middesjeep zeen oet dae tied. De tore oet daezelfde tied waerde in 1692 gesjloop. In ’t begin de zesteende eeuw waerde de noordelikke en zuidelikke beuke aangeboewd. Waat veer noe zeen is ein gotiese hallekirk (drie aevehoog beuke) van baksjtein.

Meugelik waerde ouch reste Naamse sjtein van de aaj sjtadsport gebroek.
In 1572 waerde de kirk en ’t klooster geplunderd door de troepe van Wullem van Oraanje. Det waas in 1576 weer opgeknap. In 1710 waerde de sjtad gebombardeerd in de Sjpaanse Suksessieoorlog. De kirk vloog hiedoor in brandj en det waerde ouch weer gerepereert. Dan komme de Franse, de Minderbroeders waere weggejaag, en de kirk waerd gebroek es paerdssjtal veur de troepe.

In 1820 waerd ’t koor van de kirk aan de Hervormde Gemeinte ter besjikking gesjteld, die köp in 1864 ouch de res van de kirk. ’t klooster, waat in de richting van de Perigrinus Vogelsjtraot / Bekkerssjtraot loog, waas al in 1863 gesjloop. Door nemes minder es oze Pierre Cuypers waerde de kirk in 1906 – 1908 gerestereerd. Dae zoot ouch de daakruiter midde op de kirk. Verder waerde de kirk nog gerestereerd in 1947 en 1986. De sjaaj bie de aardbeving van 1992 waas enorm en waerde ouch weer hersjteld.
De kirk is in gebroek bie de Protestantse Gemeinte Remunj.

Teks en foto’s: Guus Rüsing.