Zaoterdig 1 augustus 2020. Begienesjtraot.

Foto: Guus Rüsing

Nae, ich bedoel neet de Begienehaof, mer de Begienesjtraot. Veer beginne mit ’t Pelsersjträötje. Det is geneump nao de pelsers of pelters. Det ware de bontjwerkers. De naam van dit ambach kump al in 1396 veur. In 1903 waerde hie riolering aangelach mer, aan weersziej bleef nog eine aope ziep. Dit sjtraotje leep euver de kruutsing mit de Minderbroederssjtraot door toet aan de sjtadsmoer. Det gedeilte waerde de Begienesjtraot geneump. Waat veer allewieles zeen is det det sjträötje aafgesjlote is mit ein toe port. Ich weit neet of de diskussuie of dit waal of neet “openbare weg” is verjaord is.

Jaomer is waal det die potdichte port nieks meer leet zeen van de hoezer aan det oorsjronkelikke sjträötje. Det is des te jaomerder omdet in ’t hoes links van die port in ’t begin van de zesteende eeuw ’t woonhoes en atteljee waas van de meisterbeeldhajer Jan van Ool. ’t Zol zomer kinne det dit dezlfde is gewaes es de bekinde “Meister van Elso”. Dae hit allein mer zo omdet in de kirk van Elslo ein Anna-te-Drië, (Groormoder Anna, moder Maria en (klein-)kiend Jesus) sjeit waat es referensie waerd gebroek om zien werk te kinne identifisere. Mer … det beeld kump oet de Munsterskirk in Remunj. Dao sjteit nog meer werk van hem. Ouch nao de grote “Meester van Elsloo’ tentoonsjtelling in ’t Bonefante in Mesjtreech zeen d ‘r nog väöl vraogteikens euver: Waas Meister Jan van Ool de Meister van Elslo?

Foto’s en teks: Guus Rüsing.