De Sjtraotvaeger 2020/13: Maete mit twee maote

Laot ich toch altied gedach höbbe det de gemeinteraod ut hoogste orgaan is. As ut oetkump dan krieg de raod det predicaat maar meistal is ut ein wasse naas. De burgemeister van Vinlo bepaald via de Veiligheidsregio Noord waat der in Remunj gebeurd en leut ziene collega in Remunj in de sjteek. Nog erger de signalen van de raod waere hillemaol neet mitgenaome. Aan de eine grenspaol waere ze vrundjelik verzoch réchsomkeer te make en aan de angere grenspaol waere ze lachend doorgelaote. Maar helaas is ut vergaefse meuite want bienao geine eine pruus dreijde zich óm.

Trouwens as ut neet hoof wohróm zulle ze ouch. Mit drie persone in eine auto is good veur ein sjtevige print en op de perkeerplaats Kitskensberg waere Corona sjnoefpertieje gehaaie mit teentalle deilnaemers en de deenders doon ouch noew net of ze ut neet wete. Ut virus hilt de burgers gevange maar dao zeen der nog sjteeds die meine det ze ein (paos) ei meer höbbe en doon alles waat God verbaoje haet. Dao waert euveral mit twee maote gemaete. Handjhave is in Nederland ein waord det bliekbaar verbaoje is. Ein van die zake woh ós regering zjwaor sjteke haet laote valle. Ein anger zaak is de zórg woh ze zjwaor op bezuunig höbbe en noew mótte ós zórgmedewerkers veur twee of zelfs drie man werke. Sjteeds meer Nederlanders ligke in Duitsland op de IC want dao is waal geïnvesteerd in de zórg.

Ein Europa woh ze neet mit twee maote maete maar mit waal teen maote. De zuunige Hollénjers moge noew weer dókke veur de rés in ut Europeesche zadel te haaie. De waereld sjteit in inkele waeke tied op ziene kop en waert neet meer zo wiej ut gewaes is. Bedrieve gaon euver de kop maar ouch vereniginge ligke ut leudje. Toen de LVR vroog aan de rés van de raod om huurpenninge veur vereniginge vriej te sjtelle zo lang zie der gein gebroek van kinne make gove diej (behalve de SP) neet thoes.

De rés guf ut geldj lever oet aan culturele hoogsjténdjes. Mót der neet aan dinke det vereniginge dalik kepot gaon. Maar ut blief ouch hiej maete mit twee maote. De meerderheid van de Remunjse raod duit neet waat de burgers neudig vinje maar waat ut college leuk vinj. Ut college wit det ze mit jaoknikkers zich alles kinne permittere. Ich knap der langzaam op aaf.

Toet vaegs,

Uche Sjtraotvaeger,

Dré.