Dinsdig 21 april 2020. Buitenop

Ein foto van ein historise plek in Remunj wo nieks van die historie meer te zeen is. Hie mot de aaj voogdie oftewaal het castrum van de grave van Gelre gelaege höbbe.

In 1387, veur de belegering van de sjtad door de Franse keuning en de Braobenjers in 1388, waerde besjloate om de heuvel mit dao op ouch de perochiekirk en biegeboewe, aaf te grave. De raeje daoveur waas det men van det hogere punt in de sjtad kos kieke en waat erger waas ouch sjete. Verder vonj me oet sjtrategies ougpunt dit Buitenop sjlech te verdeidige.

De voogde van Remunj sjtinge in deens van de grave van Gelder. Eigelik bleef dees, op ein gegaeve moment erfelikke, funksie, "vicomte" oftewaal vise-graaf / burggraaf, besjtaon toet aan de Franse Revelusie. Men neumde zich "Vicomte de Ruremonde".

Door det aafgrave waerde de voogdie verplaats nao wo noe 't Wilhelminaplein / hook Voogdiesjtraot is. Dao haet ze gesjtange toet ze in 1907 gesjloop waerde.

Mit de "moderkirk" had me get meer meuijte: In de zich ontwikkelende sjtad waas eigenlik gein gooj plaats euver. Zo waerde de kirk dan mer tösse de sjtadsmoer en de mert gefoeteld. Det is noe nog te zeen aan 't Mariakoor, det haet gein normaal absisvorm maar eine rechte wandj door plaatsgebrek.

Teks en foto: Guus Rüsing.