Maondig 20 april 2020, V & D

De letters aan de gevel aan 't Munstersplein zeen 't innigste restant waat noch herinnert aan de winkel van V & D.

V & D waerde in 1887 opgerich door de zjwaogers Willem Vroom (1850-1925) en Anton Dreesman (1854-1934). De eerste winkel loog aan de Weespersjtraot in Amsterdam. Hie waerde manefakture verkoch. Det zeen sjtoffe die door waevers toes gemaak waerde. De formule waas nuuj: Eine vaste pries en kontant betale in plaats van afdinge en op raekening koupe. Wie 't bedrief in 1912 viefentwinjtig jaor besjtong ware d'r al veerentwinjtig filiale. Noe waerde ouch gerdiene, muibels, tepeite en bedde verkoch. Op 12 oktober 1912 ging 't filiaal aan de Kalversjtraot in Amsterdam aope. Dit is 't eerste echte warehoes van Nederlandj, kompleet mit lif en roltrap.

Op 't hoogtepunt ware d'r zo'n dieke sevetich winkels door 't ganse landj. Op 31 desember 2015 ginge ze fajiet. De V & D in Remunj waas pas van 1976. Ter vergelieking: Mesjtreech had al in 1907 eine V & D.

De heren Vroom en Dreesman waren euvertuugd katteliek. In nuuj filiale kwaam in 't begin dan ouch allein mer kattelieke femilie in de leijing.

Ouch väöl perseneelsleje ware katteliek. Vroom & Dreesman had eine goje naam bie kattelieke femilies det kwaam onger angere omdet d'r bie sommige filiale zelfs internate veur winkelmaedjes kwame. Zo kos men die ouch boete werktied in de gate haje en kontroleren of ze ouch nao kirk ginge.

Waat d'r noe oeteindelik mit 't pandj op de hook van 't Munstersplein / Graaf Gerardsjtraot geit gebeure is onbekind.

Teks en foto: Guus Rüsing.