Sjtille Zaoterdig

Sjtille Zaoterdig of geweun Paoszaterdig is de daag det d'r gein klokke geloejd waere toet aan de Paoswake. De klokke zeen jao nao Rome om dao de Paoseier te haole. In de kattelieke kirk waere, net es op Goje Vriedig, gein Misse gelaeze. Det moog pas saoves es 't duuster is en de Paoswake begint. Dan waerd de Paoskaers aangesjtaoke es teike van nuuj leech.

Volges de tradisie waerd ouch de alterdwaal weggehaold en zuut me dus de kaje sjtein. 't Tabernakel sjteit aope es teike det Kristus gesjtorve is en efkes neet meer onger de miense is. Op deze daag waerd dan ouch gein kommunie oetgereik, behalve in noodgevalle.

De kattelieke kirk leert ouch det Kristus op deze daag "is nedergedaald ter helle".

Euverigens waerde Paoszaoterdig 14 april 1979 de allereerste "rose" zaoterdig in Nederlandj in Remunj gehaje. Det waas toen ein demonsjtrasie taege de oetsjpraoke euver homoseksualiteit van de toen zittende bisjop Jo Gijsen. De Rose Zaoterdig dit jaor, gepland op 20 juni in Lewarde, geit waeges t Corona-virus neet door en is verplaats nao 2021.

Op de foto op deze Sjtille Zaoterdig is de in brons versjtilde sjtad van kunstenaer Frans Jansen in 't Roersentrum te zeen. Mit zien veer kirke, derteen kloosters, teen porte en 25 tores ein miniatuur sjprookjessjtad oet de middelewe. Dees makette herinnert aan 't 25-jäörig besjtaon van de Sjtadsgidse in 2007.

Guus Rüsing.