Sjtraotvaeger 2020/13: Burgemeister Donders raekent op nuuj beneuming

Of veer gein anger zórge höbbe dan ein herbeneuming van de burgemeister. Maar ouch det sjteit veur de deur. Rianne Donders haet zelf aangegaeve gaer nog ein termien te wille blieve. Binne de Remunjse raod höb ze veursjténjers en taegesjténjers. Biej ein nuuj beneuming zal ze toch zeker wille raekene op ein dieke meerderheid.

As minstes einderde van de raod al twiefels haet euver dees herbeneuming waert ut ein moeilikke bevalling. De coalisiej kin noew waal achter ein herbeneuming sjtaon maar amper ein jaor nao de tweede termien zeen der verkeezinge. Dan is maar de vraog of dees coalisiej nog ein meerderheid haet. Mit anger verhoudinge zal de eerste burger toch oet ein anger vaetje mótte tappe en zulle coffeeshops drék mótte verplaatse, euverlasgaevende jeug neet meer zoväöl ruumte kriege en zal sjienveiligheid toet ut verleeje heure.

Deze sjtraotvaeger haet al gét burgemeister mitgemaak. De eerste waas Jan Daniëls 1975-1992, eine prima eerste burger dae baove de pertieje sjting.

Herman Kaiser 1992-2002, eine miensemiens dae same mit zien vrouw Miep ein plaats in de Remunjse samelaeving hadde. Same mit Maan väöl sjoon dinger mitgemaak. De reis nao Koszalin Polen om names Remunj 300 geite te bringe waas waal ein hoogtepunt. Veur de serenades in Polen zorgde toen de famfaar Ózze Leeve Vrouw in ut Zand,

Henk van Beers 2003-2013, de burgemeister van ut volk dae same mit zien vrouw Josje de herte van väöl Remunjenaere had gesjtaole. Eine man nao mien hert. De prachtmatische burgemeister mit veur ederein ein hertelik waord. De verbinjer en veural ouch geweun ‘de eerste burger’. Toen kwaam Peter Cammaert 2013-2015 as tiedelikke eerste burger. Geweun eine sjoone miens dae Remunj as létste oetdaging zoog.

Rianne Donders 2015-2021. Ich zit der maar 2021 biej omdet Rianne ut Remunj en zichzelf neet mót aandoon om geforceerd nog ein periode der aan vas te plekke. Rianne is de eerste burgemeister mit de twiefelachtige eer ein petitie taege zich te höbbe mit maar leefs 400 óngersjteuners, hóngerde reacties die taege häör herbeneuming zeen, knallende ruzie’s in de raodzaal, en ein sollisitasie (die ze ontkind) in Den Bosch. Dees periode is ein verlaore periode en nao 2022 mót Remunj puin ruume en weer hil hél wirke aan ein baeter aanzeen. Zal ein zjwaore opdrach waere en dao heurt eine nuuje burgemeister biej. Missjien waal emes oet Remunj. Marianne Smitsmans zou ut kinne. Maar ouch Dirk Franssen en Lieke van Hal höbbe gét in häöre mars.

De tied zal ut lere.

Toet vaegs,

Uch sjtraotvaeger, Dré.